နန်းတက်ပွဲများ
ဝါခေါင်လဆန်း (၁၂) ရက်
ပွဲတော်ရဲ့အစည်ဆုံးနေ့ ထုံးစံအတိုင်း နေပူပူအောက်မှာ လူပင်လယ်လှိုင်းကြီးကို တွေ့နိုင်တယ်။
နတ်ဒိုးသံဟာ ပွဲတော်တစ်ကွင်းလုံးကို ဖုံးလွှမ်းထားတယ်။
ဘယ်နေရာသွားသွား နတ်ဒိုးသံကို ကြားနိုင်တယ်။
ကနားတဲခန်းများစွာက ကြွေခေါက်သံတွေဟာလည်း ဒီနေ့အဆူညံဆုံးပဲ။
ရှည်မျောမျော ကနားတဲခန်းလေးတွေပေါ်မှာ လူတွေ အပြည့်ဒူးလေးတွေ တုပ်လို့။ ကနားတဲခန်းတွေပေါ်က နတ်ကတော်အားလုံးမှာ နတ်တစ်ပါးပါး ပူးဝင်နေကြပြီး ထိုင်ရင်းနဲ့ ယိမ်းယိုင်နတ်ဝင်ကြတယ်။ များသောအားဖြင့်ကတော့ မင်းနှစ်ပါးနဲ့ ပခန်းဦးမင်းကျော်ပေါ့။ ဟိုကနားတဲပေါ်မှာ ဖေကြီးကျော်၊ ဒီကနားတဲပေါ်မှာလည်း ဖေကြီးကျော်၊ ဟိုကနားတည်းပေါ်မှာလည်း မင်းကြီးမင်းလေး၊ ဒီကနားတဲပေါ်မှာလည်း မင်းကြီးမင်းလေး။
လူအားလုံးကတော့ ကိုယ်ရောက်နေရာ ကနားတဲပေါ်က မင်းကြီးမင်းလေးကို၊ ဖေကြီးကျော်ကို ရိုသေပျပ်ဝပ်စွာ ဒူးတုပ်ရှိခိုးကြရင်း မ ခိုင်းကြလို့။
အရောင်းအဝယ်ကောင်းအောင် မ ပါဘုရား။
ထီပေါက်အောင် မ ပါဘုရား။
ရာထူးတက်အောင် မ ပါဘုရား။
နိုင်ငံခြားသွားရအောင် မ ပါဘုရား။
တိုက်တည်ရအောင် မ ပါဘုရား။
အက်စ်အီးဝယ်နိုင်အောင် မ ပါဘုရား။
သားတွေ သမီးတွေ ဂုဏ်ထူးများများနဲ့ ဆေးဝင်အောင် မ ပါဘုရား။
မ ပါဘုရား များစွာကို မင်းနှစ်ပါးနဲ့ ဖေကြီးကျော်တို့က ဖြစ်စေဟဲ့လို့ တာဝန်ယူအာမခံတဲ့အခါ ကန်တော့ကြေးနဲ့ ကြက်လောင်းကြေး၊ ပုလင်းဖိုးတို့ကို ဝမ်းသာအားရ ဆက်ကြတယ်။ ဖေကြီးကျော်ရဲ့ ဝါသနာအရ ‘ဟေ့… အဖေကြီးက လုပ်လို့၊ ‘မ’ ဖြစ်လာခဲ့ရင် ဘယ်နှယ့်လဲကွ’ လို့ လောင်းစားတဲ့အခါ ‘မှန်ပါ… ဖြစ်လာခဲ့ရင် အဖေကြီးအတွက် ပျော်ပွဲများ ပေးပါမယ်ဘုရာ့၊ တက်ပွဲများ ပေးပါမယ့်ဘုရာ့’နဲ့ အပေးအယူ ကတိစကားတွေကို လျှောက်တင်ကြရပြန်တယ်။ နတ်ကတော်တွေရဲ့ ကန်တော့ပွဲနဲ့ ကြက်ဖလားထဲမှာ ငွေတွေနဲ့ မောက်လျှံနေတယ်။
ဒီလိုနေ့ကတော့ ဆုတောင်းပြည့်ဘုရားဝင်းထဲ တစ်နေရာမှာ ပိတ်ဖြူလေးခင်း၊ ဖလား လေးရှေ့ချ၊ နတ်ဟောတဲ့ နတ်ကတော်တောင် ဖလားထဲ ပိုက်ဆံပြည့်တယ်။ ဆယ်တန်၊ ငါးကျပ်တန်၊ ကျပ်တန် ကလေးတွေပေါ့။ လူတန်ခိုးရှိတဲ့ ကနားတဲတန်းတွေပေါ်က ဖလားတွေထဲမှာလိုတော့ ကိုးဆယ်တန် နှစ်ရာတန် မပါဘူးပေါ့။
ဘုရားဝင်းထဲမှာ နတ်မေးတဲ့သူတွေက ညဆို တစ်ချပ် ငါးကျပ်တန် ဖျားငှားအိပ်ပြီး မနက်ကျ ပါလာတဲ့ စားအိုး စားခွက်လေးနဲ့ ဖြစ်သလို ထမင်းဟင်းချက်စားတဲ့ ရွားနီးချုပ်စပ်က နွမ်းပါးတဲ့ သူတွေ။
ဘုရားဝင်းထဲမှာ ဖျာငှားစားတဲ့သူတွေ ရှိတယ်။ ဈေးပေါပေါထမင်းဆိုင် ရှိတယ်။ ဘုရားအထွက်မှာ ဟင်းချက်စရာ ပျံကျဈေးလေးလည်း ရှိတယ်။
ဒီလိုရက်မှာ ဖျာငှားစားသူတွေလည်း ပျော်ကြတယ်။
ဝါးတောင်းပက်ပက်လေးတွေနဲ့ အဆင်သင့် ကန်တော့ပွဲလေးတွေ ရောင်းတဲ့သူတွေလည်း ပျော်ကြတယ်။
ရောင်စုံ ဗောင်းတော်ပဝါရောင်းတဲ့သူတွေလည်း ပျော်ကြတယ်။
ဆုတောင်းပြည့်ဘုရားဝင်းထဲက မင်းနှစ်ပါး လူ့ဘဝတုန်းက ဒိုးထိုးဆော့ကစားခဲ့တဲ့နေရာမှာ ဒိုးသည်ကလေးတွေလည်း ပျော်ကြတယ်။ ပန်တော် ပန်းသည်လေးတွေကတော့ မျက်စိတောင် မဖွင့်တော့ဘူး။ ဒီရာသီမှာပေါ်တဲ့ မြစ်ကြီးနား နာနတ်သီးသည်တွေ၊ အအေးဆိုင်တွေ၊ ပွဲတော်မုန့်သည်တွေ၊ တောင်ပြုန်းလက်ဆောင် ဆွဲကြိုး၊ လက်ကောက် ရွှေတုဆိုင်လေးတွေ၊ ခါးပိုက်နှိုက်တွေ၊ လူပင်လယ်လှိုင်းလုံးကြီးကို အမှီပြုပြီး အားလုံးပဲ ပျော်ကြပါတယ်။
မုန့်ဖက်ထုပ်၊ စလူမုန့်၊ ကရေကရာ စတဲ့ ပွဲတော်မုန့်ထုပ်လေးတွေကို ကိုင်ပြီး လည်ပင်းတွေ၊ လက်တွေမှာ ဝင်းဝင်းလက်နေအောင် ရွှေဆွဲကြိုး၊ ရွှေလက်ကောက်အတုတွေကို အပျော်ဝတ်ဆင်ထားကြတဲ့ လူတွေဟာ ကနားတဲခန်းတွေပေါ်မှာ ရောက်ရှိနေကြတဲ့ မင်းနှစ်ပါးနဲ့ ဖေကြီးကျော်ဆီကို တိုးဝှေ့သွားလာနေကြတယ်။ ဒါပေမယ့် နန်းကြီးအနီး ခြံဝင်းထဲက ဂျိန်းစဘွန်းမကြီး ဒေစီဂျိန်းရဲ့ နတ်နန်းအိမ်ပေါ်မှာပူးကပ်ရောက်ရှိနေတဲ့ နတ်ကတော့ မင်းနှစ်ပါးနဲ့ ဖေကြီးကျော် မဟုတ်ဘူး။ မိန်းမတွေ အလွန်သဘောကျတဲ့ အမေဂျမ်းနတ်လေ။
‘ဟဲ့… အမေက လမ်းဆုံက ဂျမ်းဘုံဟဲ့။ ပါးစပ်ကလည်း ခပ်ကြမ်းကြမ်းပဲ။ အမေက ထန်းရည်လေး အရက်လေးလည်း ကြိုက်တယ်။ အမေ့လင်က ကိုတက်ခါး၊ သူခိုးကြီး ငတတ်ပြားဆိုတဲ့ ကိုတက်ခါး၊ ကိုတက်ခါးက နေပြည်တော်မှာ ရွှေတိုက်စိုးဘဝနဲ့ ကောင်းစားပြီး အမေ့ဆီပြန်မလာတော့ အမေက လိုက်သွားတယ်။ နေပြည်တော်နား အမေရောက်သွားတော့ ဘုရင့်တပ်မတော်ကြီး ချီလာတာကို အမေက တောသူပဲ၊ ဘယ်သိမလဲ။ လမ်းကို ဖြတ်ပြေးတော့ ဟဲ့… ဘုရင့်တပ်မတော်ကြီး ချီလာတာကို တပ်ဦးက ဖြတ်ကူးရဲတာ ဘယ်သူလဲဟဲ့ ရှေ့တော်သွင်းဆိုပြီး အမေ့ကို စစ်သားတွေက ဖမ်းတော့ အမေက ထန်းရည်ကလည်း မူးမူးနဲ့ အယုတ္တ အနတ္တကုန်အောင် ဆဲချလိုက်တယ်ဟဲ့’
အမေဂျမ်းရဲ့ ညစ်ညမ်းကြမ်းတမ်းတဲ့ အဆဲတွေကို မိန်းမတွေက ရှက်မျက်နှာတွေနဲ့ သဘောကျရယ်ကြတယ်။ သာမန်အချိန်ဆို ဘယ်နားထောင်ရဲပါ့မလဲ။ ဒါ နတ်ဝင်နေလို့ နားထောင်ရဲတာပေါ့။ နတ်ကတော်ကလည်း သာမာန်အချိန်ဆို ဒီလို ဂုဏ်သရေရှိ မိန်းမတွေရှေ့ ဘယ်ဒီလိုထွက်ရဲမလဲ။ ဒါ နတ်ဝင်နေလို့ ထွက်ရဲတာပေါ့။
ဒေစီဂျိန်းကတော့ ပြောင်းဖူးဖက်ဆေးလိပ်ကြီးကို အဘွားကြီးလို ဖွာလိုက်၊ လက်ဖက်ဆီစိမ်လေး ကောက်မြုံလိုက်၊ အရက်လေး တစ်ကျိုက်ကျိုက်လိုက်၊ ပြောချင်တဲ့ ညစ်တီးညစ်ပတ်တွေကို အမေဂျမ်းအကြောင်းပြုပြီး ပြောလိုက်နဲ့ ကြော်တဲ့ လှော်တဲ့လုပ်ငန်းမှာ ကောင်းကောင်းကြီး အရှိန်ရနေတော့တယ်။
‘အေး… အဲဒီမှာ ဒါလောက်ရိုင်းပျကြမ်းတမ်းတဲ့ တောသူမဆိုပြီး အမေ့ကို ရိုက်သတ်ပစ်လိုက်ကြလို့ အမေ သေရတာ။ ဘယ်ကို ရိုက်သတ်တယ်ဆိုတာကိုရော ပြောရဦးမလား’
‘တော်ပါတော့ အမေရယ်၊ မပြောပါနဲ့တော့၊ မပြောပါနဲ့တော့’
ဘေးနားက မင်းမင်းက ဒေစီဂျိန်းအကြောင်းကို သိလို့ အသာဝင်ထိန်းတယ်။ နည်းနည်း ထွေတေတေဖြစ်နေတဲ့ ဒေစီဂျိန်းက မင်းမင်းကို မျက်စောင်းထိုးကြည့်တယ်။
‘ဟင်… အမယ်လေး… ကိုတက်ခါးပါလား။ မောင်ကိုတက်ခါး’
ဒုက္ခပါပဲ။ ပြောမိကာမှ ပိုဆိုးကုန်ပြီ။ အဲဒါမျိုးတွေ သိပ်ရှက်တာ။ သိပ်စိတ်ညစ်တာ။ မင်းမင်း မအီမသာမျက်နှာနဲ့ သူ့ပေါ်လှဲချလိုက်တဲ့ ဒေစီဂျိန်း အမေဂျမ်းကို အသာထိန်းပွေ့ထားရတယ်။ လူရှေ့သူရှေ့မှာ ဒါမျိုးမလုပ်ပါနဲ့လို့ ဘယ်နှခါပြောပြော ဘယ်တော့မှ မရဘူး။
ဒါပေမယ့် ခုလိုအချိန် မင်းမင်း စိတ်မဆိုးရဲဘူး။ သူ့ကို ပစ်ချပြီး ထမသွားရဲဘူး။ မင်းမင်းလုပ်လိုက်ရင် အမေဂျမ်းထက်တောင် ကြမ်းတဲ့ အမေဂျိန်းက လူရှေ့သူရှေ့မရှောင် အရှက်ခွဲပြလိမ့်မယ်။ အမေဂျမ်းအရှိန်နဲ့ ပိုတောင်ဆိုးနိုင်တယ်။ တစ်ခါ မင်းမင်းခံရပြီးပြီလေ။ ပျော်ပွဲပေးတဲ့ ကနားပွဲတစ်ပွဲမှာ သူ အမေဂျမ်းဝင်တော့ ထုံးစံအတိုင်း မင်းမင်းက လုပ်ပေးနေကျဖြစ်တဲ့ ပဝါစွန်းမှာ ပရုတ်ဆီသုတ်ဖို့ကိစ္စမေ့သွားတယ်။
အမေဂျမ်းက သူ့ဘဝအကြောင်း ခုနလိုပြောပြီး ကိုတက်ခါးကို လွမ်းတဲ့အခါမှာ မျက်ရည်အစစ်ကျပြီး ဆိုင်းနဲ့ ကမှာလေ။ ပဝါစွန်းကို ပရုတ်ဆီသုတ်ဖို့ မင်းမင်းက မေ့နေတော့ ဘယ်လောက်တို့တို့ မျက်ရည်မထွက်တော့ဘူး။ မထွက်တော့ မင်းမင်းကို အသာကပ် မေးတယ်။ အဲဒီမှာ ဟာ… မေ့သွားတယ်လို့ မင်းမင်းကလည်း ပြောလိုက်ရော အမေဂျမ်းဘဝနဲ့ ဆဲလိုက်ဆိုလိုက် ပြောလိုက်တာ ရစရာကို မရှိတော့ဘူး။ အေးလေ မင်းမင်းဘဝမှာ ရှက်ခြင်းဆိုတာကို မေ့ထားခဲ့ရတာ ဘယ်လောက်ကြာပြီလဲ။
‘ကဲ… ကောင်မတွေ ဘာရယ်ကြတာလဲ။ နင်တို့က ဟင်… ကိုတက်ခါးက ငါ့လင်ဟဲ့ သိလား။ တေးသီမဆုံးတဲ့ အေးကြည်ကုန်းက အမေဂျမ်းလင်။ ဟဲ့… ဟဲ့… ဆက်ကြ၊ ငါ့ထန်းရည်ဖိုး၊ လက်ဖက်ဖိုး’
မိန်းမတစ်သိုက် ရိုရိုသေသေ ရှေ့တိုးပြီး ပိုက်ဆံတွေ ဆက်ကြတယ်။ ဒေစီဂျိန်းက ခေါင်းတုန်တုန်၊ လည်တုန်တုန် မျက်စိမှုန်မှုန်အဘွားကြီး ဟန်ပန်အမူအရာနဲ့ မိန်းမတစ်ယောက်ကို လက်ကာကြည့်တယ်။
‘ဟဲ့ကောင်မ၊ နင် အရောင်းအဝယ်တစ်ခု ဓိဠာန်ထားတယ် မဟုတ်လား။ အေး… အဲဒီအရောင်းအဝယ် အောင်မြင်အောင် အမေက လုပ်ပေးမယ်တော့်၊ လုပ်ပေးမယ်’
ဒေစီဂျိန်းရဲ့ နောက်ဆက် ညစ်တီးညစ်ပတ်စကားတွေကိုပဲ မိန်းမက လက်အုပ်ချီ နာခံယုံကြည်လို့ နေတယ်။
‘ဟဲ့… ဟိုကောင်မ တစ်ယောက်ကရော။ ရှေ့တိုးဟဲ့၊ အမေ့နားလာ၊ လင်မှုကြောင့် ရင်ထုနေရတဲ့ကောင်မ၊ ဘာမှ မပူနဲ့။ အမေပြန်ခေါ်ပေးမယ်။ အမေ ထဘီတစ်ခါယမ်းရှိတယ်ဟဲ့။ ကိုတက်ခါးတုန်းကလည်း အမေ့မယ် ဒီလိုပဲ၊ ကြားလားဟဲ့… ဟိုကောင်မ’
ရွှေတွေ၊ စိန်တွေ သီးနေတဲ့ မျက်နှာမသာမယာနဲ့ မိန်းမတစ်ယောက်က ရှေ့တိုးပြီး လေးဆယ့်ငါးကျပ်တန်တစ်ရွက်ဆက်တယ်။ တစ်ခါတည်း အမေဂျမ်းက ဗြက်ဆိုဆွဲပြီး လွှင့်ပစ်လိုက်တယ်။
‘ငါက ဒီပိုက်ဆံလောက်ကို ဘာလုပ်ရမှာတုံးဟဲ့။ ဟင်း…ညည်းက အမေဂျမ်းအတွက်ကျ နှမြောတယ်။ အောက်လမ်းတွေနဲ့ဓါတ်ရိုက်ဖို့ကျ ကုန်ချင်သလောက်ကုန်၊ ဟုတ်လားဟဲ့’
‘မဟုတ်ပါဘူး အမေရယ်၊ ကျေနပ်ပါ။ အမေ့သား ပြန်လာတော့ ပျော်ပွဲများ ကျင်းပါ့မယ်’
‘ဟေ့… မလိုချင်ဘူး။ ခုချက်ချင်းလုပ်။ လေမလိုချင်ဘူး။ လေပေးရင် လေရမှာပဲ။ နတ်ကလည်း ရှင်းရှင်းပဲ ပြောတတ်တယ်’
ဟော… လုပ်ကုန်ပြီ။ ဒေစီဂျိန်းစကားတွေ ပါလာပြီ။ ထုံးစံအတိုင်း မင်းမင်းက ခပ်ပြုံးပြုံးနဲ့ ဟိုမိန်းမကို အသာမေးငေါ့ပြရင်း အခြေအနေကို ဝင်ထိန်းရတယ်။
ဟိုမိန်းမက ပိုက်ဆံအိတ်ဖွင့်ပြီး နှစ်ရာတန်တစ်ချပ် ထုတ်ရှာပါတယ်။
‘လမ်းဆုံက ဂျမ်းဘုံ၊ နာမည်တစ်လုံးနဲ့နေတာ။ သူများဆီ မသဒ္ဓါရေစာကို အတင်း ဓါးပြတိုက်မတောင်းဘူး။ မကျေနပ်ရင် ပြန်ယူသွားပါ’
ကြည့်… ကြည့်၊ လုပ်လိုက်ပါလိမ့်မယ်။ ဒေစီဂျိန်းတို့ကတော့ လုပ်လိုက်ပါလိမ့်မယ်။ ဟိုမိန်းမမယ် ကျေနပ်ပါ အမေရယ်… အမေရယ်နဲ့ပြောလိုက်ရတာ။ မင်းမင်းကပါ ‘ကျေနပ်ပါ အမေ’ ဘာညာနဲ့ဝင်ထိန်းမှ နောက်မိန်းမတစ်ယောက်ဆီကို ကူးသွားတယ်။
ဒီလိုပဲ ဒေစီဂျိန်းတို့ကတော့ မင်းမင်း ဘယ်လိုပြောပြ၊ ပြောပြ ဘယ်တော့မှ မရဘူး။ ကိုယ့်အလုပ်က သူတို့ဆီက ပိုက်ဆံရအောင်တောင်းဖို့ အရေးကြီးတာ။ ပါးစပ်ကလေးပဲ။ ပါးစပ်ကလေးက လိမ္မာဖို့ပဲ၊ ချိုသာဖို့ပဲဆိုတာ ဘယ်တော့မှ နားမလည်ဘူး။ ငါက ချိုချိုလေးနဲ့ လိမ်ရမှာပေါ့ဆိုတာတွေက လုပ်လိုက်သေးတယ်။
ဒါ လိမ်တာမှ မဟုတ်တာ။ မင်းမင်းကတော့ ကိုယ် ထမင်းစားနေတဲ့ ဒီအလုပ်ဟာ လိမ်စားတဲ့အလုပ်လို့ မထင်ပါဘူး။ ပိုက်ဆံတွေပိုလျှံနေတဲ့သူတွေက သူတို့အကျိုးအတွက် ပေးတဲ့ပိုက်ဆံကို မင်းမင်းတို့ ခွဲဝေစားကြတာပါ။ ဒေစီဂျိန်းကို မှီခိုနေတဲ့အဖွဲ့၊ ဆိုင်းမိသားစု၊ နောက်ဆုံး ငှက်ပျောသီး၊ အုန်းသီးသည်လေးတွေအဆုံး ခွဲဝေစားကြရတယ်။
ဒီခေတ်ကြီးမှာ မိသားစုတော်တော်များများကို ဒီအလုပ်က ထမင်းဝအောင် ကျွေးနိုင်တယ်လေ။ ဒီတော့ ပိုက်ဆံတွေကို ပိုနေတဲ့သူတွေဆီက ပိုက်ဆံရအောင် တောင်းတာဟာ တရားတယ်လို့ မင်းမင်းထင်တယ်။ အရှုပ်မကြီးရယ်၊ ခင်ဗျား ကြော်လှော်နေတာတွေဟာ မိသားစု တော်တော်များများ ထမင်းစားဖို့ ဖြစ်တဲ့အတွက် ခင်ဗျား ကုသိုလ်ရပါတယ်။
‘အေး… အေး၊ လိုချင်တာရစေ့မယ်ဆိုရင် ကျေနပ်တယ် မဟုတ်လား။ အမေ့ထဘီ တစ်ခါမယမ်းရပါဘူး သမီးရဲ့၊ ဟုတ်ရဲ့လား’
ဒေစီဂျိန်းတစ်ယောက် ကြော်လို့လှော်လို့ ကောင်းနေတုန်းမှာပဲ မိန်းမတစ်ဖွဲ့ တဝုန်းဝုန်း အိမ်ပေါ်တက်လာကြတယ်။
‘ကိုဘစီ… ကိုဘစီ၊ ကျူပ်တို့ ဆွဲကြိုးဖြတ်ခံရလို့’
‘ဘာဟဲ့’
အမေဂျမ်း ရုတ်တရက် ကြောင်သွားတယ်။ မိန်းမတွေက ဒေစီဂျိန်းကို ကိုဘစီပဲ ခေါ်တဲ့ အောက်ဘက်က ဆွေမျိုးတောသူဌေးတွေ။ ပြီးတော့ ဒီနေ့ညနေ တက်ပွဲဒကာတွေ။
‘ဟဲ့… ဘယ်သူ့ဆွဲကြိုးလဲ’
ဒေစီဂျိန်းတို့ကတော့ ချက်ချင်း ဒေစီဂျိန်းဆီက အမေဂျမ်း လိပ်ပြာခွာသွားတယ်။
‘ကျုပ်ဆွဲကြိုးလေ၊ နှစ်ကျပ်သား ကြိုးကြီး။ လုပ်ပါဦး ကိုဘစီ၊ နတ်မေးပါဦး’
‘သြော်… ဟဲ့…ငါမပြောလိုက်ချင်ဘူး။ ခါးပိုက်နှိုက်က ဖြတ်သွားတာ နတ်က တက်နိုင်မလား။ ကဲ… ညည်းတို့ ငါ အတန်တန်မှာလိုက်ရဲ့သားနဲ့။ ဟဲ့… မင်းမင်း လာ’
ခေါ်ပြီ ခေါ်ပြီ။ သူလုပ်ချင်ရာတွေ လုပ်ဖို့အတွက် မင်းမင်း ခေါ်ပြီ။ ဒီမှာ… အမေဂျမ်းပရိတ်သတ်တွေကို ပြေလည်အောင် မင်းမင်းက ရှင်းပြနေတုန်း ရှိသေးတယ်။
‘ဘာလဲ… ဘာလဲ ခင်ဗျားက ဘာလုပ်မှာလဲ’
‘ဟဲ့… ဘာလုပ်ရမှာလဲ၊ ရဲစခန်းတိုင်မှာပေါ့။ သွား… နင်က ရဲစခန်းမှာ တိုင်ချက်သွား ဖွင့်။ ငါက ငွေခင်ဆီ သွားမယ်’
‘ဘာလုပ်ဖို့လဲ။ ငွေခင်က ဘာလုပ်ဖို့လဲ’
‘ဟဲ့… နင်သိသားနဲ့။ ပွေချင် ငွေခင်ဆီသွား၊ ကိုယ်က အရှုပ်အပွေကိစ္စဖြစ်ပြီ။ သူ့ဆီက ရဲစခန်းထက်တောင် မြန်ချင်မြန်ဦးမယ်။ သွား… သွား… ငါပြောတာလုပ်။ ဟဲ့… ပိုက်ဆံရှိရဲ့လား။ ရော့… ပိုက်ဆံက ပါသွားမှ’
လုပ်တော့မယ်၊ လုပ်တော့မယ် ကြည့်၊ ခုန အမေဂျမ်း မိန်းမတွေဆက်ထားတဲ့ ပိုက်ဆံတွေထဲက နှစ်ရာတန်တစ်ချပ် လှမ်းယူတယ်။ တော်သေးတယ်။ ဟိုဆွဲကြိုးဖြတ်ခံရတဲ့ မိန်းမက ဒီကယူ… ဒီကယူဆိုပြီး ပိုက်ဆံလှမ်းပေးလို့။
ဟော… သူကတော့ အိမ်နေရင်းဝတ် ပုဆိုးထဘီ ဖိုသီဖတ်သီကြီးနဲ့ ခုံဖိနပ်ကြီးစီးပြီး ဘောက်ဆတ် ဘောက်ဆတ်နဲ့ ထွက်သွားပြီ။
‘အဖော်တစ်ယောက် ခေါ်သွားပါလား’
‘မလိုဘူး၊ ဘယ်သူမှ မလိုက်ခဲ့နဲ့’
ဒေစီဂျိန်းက ပြန်အော်ပစ်လိုက်ပြီး ဘောက်ဆတ် ဘောက်ဆတ်နဲ့ ကနားတဲခန်းတွေကြားထဲ တိုးဝင်သွားတယ်။ သွားရင်းက အိတ်ထောင်ထဲက မျက်မှန်ကို ထုတ်တပ်တယ်။ မျက်စိက မှုန်ပြီလေ။ မျက်မှန်က တပ်ရပြီ။ ငါးဆယ်ကျော် ခြောက်ဆယ်တွင်းပဲ မှုန်ပြီပေါ့။ လူကသာ အရွယ်တင်လို့ ငါးဆယ်ကျော် မထင်ရတာ။
ငွေခင်ကို ဘယ်မှာ လိုက်ရှာရပါ့မလဲ။ ဒါလောက် ပြွတ်သိပ်ထိုးနေတဲ့ ကနားတဲတွေကို တစ်ကနားဝင် တစ်ကနားထွက် လိုက်ရှာရင်တော့ သေလိမ့်မယ်။ ဒီအခြောက်မ ကနားက နေရာအတည်တကျရှိတာ မဟုတ်ဘူး။ ဒီနှစ် တစ်နေရာ၊ နောက်နှစ် တစ်နေရာ။ ပြောင်းချင်ရာ ပြောင်းနေတာ။
ဒီဟာမက လူပေ၊ လူတေ၊ လူရွတ်မ။
နာမည်တစ်လုံးနဲ့နေတာ။ ‘ပွေချင် ငွေခင်ဆီသွား’တဲ့။
သူ့နာမည်ရင်းက သောင်းခင်ပါ။ ရှုပ်ရမယ့်ကိစ္စ၊ ပွေရမယ့်ကိစ္စမှန်သမျှ သူ မပါရင် မပြီးဘူး။ ပြီးတော့ ဘယ်အချိန်ဖြစ်ဖြစ် သူ့ကြည့်လိုက်ရင် ဘိုင်ပြတ်နေတာချည်းပဲ။ သူ့လက်ထဲ ပိုက်ဆံက ဘယ်တော့မှ ကြာကြာမနေဘူး။
ဒါကြောင့် သူ့ကို ဝိုင်းပြီး ငွေခင် ငွေခင်နဲ့ ခေါ်ရင်းက ငွေခင်ဖြစ်သွားရော။ ပွဲတော်တွင်းမှာ အတိုးနဲ့ ငွေချေးချင်လား၊ ရွှေပေါင်ချင်သလား၊ ရောင်းချင်သလား၊ နတ်ပုံတော် ပေါင်ချင်သလား၊ ကြက်ဖလား ပေါင်ချင်သလား၊ တောင်ရှည်ပုဆိုး ပေါင်ချင်သလား၊ ထိုင်မသိမ်း ပေါင်ချင်သလား၊ မိန်းမလျာ ယောက်ျားချင်း အလဲအလှယ်လုပ်မလား၊ ယုတ်စွအဆုံး ခါးပိုက်နှိုက်ခံရရင်တောင် သူ့ဆီ သွားစုံစမ်း၊ ရဲစခန်းထက် မြန်မြန်သိနိုင်တယ်။
သူ့ကို ကိုးကွယ်တဲ့သူတွေထဲမှာ ခါးပိုက်နှိုက်တွေ ပါတယ်လေ။ ကဲ… ကုန်ရော၊ အဲဒီတော့ အရှုပ်အပွေကိစ္စတွေနဲ့ ပတ်သက်ရင် ငွေခင်ဆီသွား။ ‘ပွေချင် ငွေခင်ဆီသွား’ပဲ။
သူနဲ့ ဒေစီဂျိန်းတို့က တစ်ရွယ်တည်း၊ ရွယ်တူသူငယ်ချင်းတွေ။ တောင်ပြုန်းပွဲကို ရောက်တာကျ ငွေခင်က စောတယ်။ ဒေစီဂျိန်းရောက်တဲ့နှစ်မှာ သူက အလည်မဖြစ်နေပြီ။ နန်းကြီးရှေ့ သံတံခါးရိုးရာမှာ ခုန်ကြရင်း သူငယ်ချင်းဖြစ်သွားကြတာ။ မဟုတ်တာ မှန်သမျှ သင်ပေးတဲ့ဆရာလည်း ဆရာပေါ့။ ဒေစီဂျိန်းနဲ့ကို အောက်ဘက်က နတ်ကနားပွဲတွေ လိုက်ကနေသေးတယ်။ ဟိုတုန်းက သူကလည်း ဆံပင်ရှည်နဲ့။ ဆံပင်တစ်ရပ် လူတစ်ရပ်။ အောက်ဘက်က နတ်ဆိုရင် ဆံပင်ရှည်နဲ့မှလေ။
‘ဟဲ့… ဒေစီဂျိန်းကြီး၊ ဘယ်တုံးဟဲ့။ လင်ပျောက်လို့လား’
ဘေးကနားတဲတွေဆီက လှမ်းအော်တဲ့ အခြောက်မ အသံပြာပြာပေါ်လာတာနဲ့ ဒေစီဂျိန်းက မိန်းမလျာတို့ရဲ့ပင်တိုင် လက်သုံးအဆဲ ဖေနဲ့ ကိုင်တုတ်ပစ်လိုက်တယ်။ ကြည့်စမ်း၊ ဘယ်သူလဲလို့။ လက်ကောက်မ မိနွေလေ။ မိတ်ကပ်တွေနဲ့၊ ပန်းတွေနဲ့၊ ကြွေကလပ်ရှေ့မှာ စီးကရက်ကြားညှပ်နဲ့ ကြော်လှော်နေတာလေ။
‘ဟဲ့… ငွေခင့်နန်းက ဘယ်နားမှာလဲဟဲ့။ လက်ကောက်မ’
‘သူက နတ်သမီးပဲဟဲ့။ တာဝတိံသာမှာ နေမှာပေါ့’
ဒေစီဂျိန်းက ဒုတိယအကြိမ် ဖေနဲ့ကိုင်တုတ်လိုက်ပြန်တယ်။
‘ဟဲ့… ပြောစမ်း၊ ဘယ်နားမှာတုံး’
‘တကယ်မသိဘူး။ သူများတွေ မေးသွား’
ဒေစီဂျိန်း နောက်တစ်ကြိမ် ထပ်ဆဲပြီး ဘောက်ဆတ် ဘောက်ဆတ်နဲ့ ကနားတဲတွေကြား တိုးရပြန်တယ်။
လက်ကောက်မဆိုတဲ့ဟာမ ပါးရေ နားရေ တွန့်တာတောင် အချိုးက မပြောင်းဘူး။
ဒေစီဂျိန်းရယ်၊ ငွေခင်ရယ်၊ လက်ကောက်ရယ်က သက်တူရွယ်တူ သူငယ်ချင်းတွေ။ ဟိုတုန်းက မိန်းမလျာပေါက်စလေးတွေဘဝနဲ့ တောင်ပြုန်းမှာ အတွဲညီခဲ့ကြတာပေါ့။ ဘာမှ မသိဘူး။ လှလှပပဝတ်စားပြီး သံတံခါးရိုးရာ ကဖို့ရယ်၊ လူတွေနဲ့ တရုန်းရုန်းလုပ်ဖို့ရယ် ဒါပဲ။ အချိန်တန် သူငယ်ချင်းသုံးယောက် ဖြီးလိမ်းပြီး ထွက်ကလိုက်ကြ၊ ပျော်လိုက်ကြ၊ မိုးလင်းပေါက် လျှောက်သွားပြီး ပြန်လာအိပ်၊ နိုးတာနဲ့ ရေမိုးချိုးစားသောက်၊ ပြင်ဆင်ပြီး ပြန်ထွက်၊ ဘယ်လိုပျော်မှန်းမသိဘူး။
သူငယ်ချင်းသုံးယောက် ကနားတဲလေး တစ်တဲမှာ စုငှားနေကြတာ။ တစ်နှစ်တာတော့ ငှားတဲ့လူတွေများတယ်။ နင်တို့က လူရင်းတွေ၊ နင်တို့လည်း ကျယ်ကျယ်ဝန်းဝန်း နေရအောင် ဘုန်းကြီးကျောင်းထဲ နေကြဆိုပြီး ကနားတဲတွေ ငှားစားတဲ့ မသိန်းသိန်းဆိုတဲ့ မိန်းမက လောဘတိုက်ပြီး ဒေစီဂျိန်းတို့ကို ဘုန်းကြီးကျောင်းဝင်းထဲ ထားပေးတယ်။ ဒါပေမယ့် သူတို့ချင်း ပိုက်ဆံအဝေမတည့်မှုနဲ့ ဘုန်းကြီးက ပစ္စည်းတွေ ဆွဲလွှင့်ပစ်ပြီး ကျောင်းထဲက နှင်ထုတ်လိုက်တာပေါ့။
သူငယ်ချင်းသုံးယောက် ဘုံပျောက်ရော။ ရယ်လည်း ရယ်ရ၊ စိတ်ကလည်း ညစ်ပေါ့။
‘ဟေ့… အချိန်တန် အမှန်ဖြစ်ရင် ကျေနပ်တယ် မဟုတ်လား။ ဘုရင်ကျော် သခင်ကျော်၊ ဖေကြီးကျော်အကြောင်း သိတယ်မဟုတ်လားဟေ့’
ဟိတ်နဲ့ ဟန်နဲ့ ကြိမ်းမောင်းလိုက်တဲ့ အသံလာရာဆီကို ဒေစီဂျိန်း လှမ်းကြည့်လိုက်တော့ အလို… နတ်မိမယ် စိမ်းကလျာပါလား။ မကြာခင်က လင်နဲ့ကွဲထားတဲ့ စိမ်းကလျာ။
‘လိပ်ပြာရှင်က လင်တရူးနေတာပါတော့်။ လင်တရူးနေတာပါ’
ဒေစီဂျိန်းက အော်အော်လျှောက်လျှောက် လျှောက်ရင်း နှောက်ပစ်ခဲ့တယ်။ ဖေကြီးကျော် ပူးနေတဲ့ စိမ်းကလျာကတော့ နှောက်သွားတဲ့ ဒေစီဂျိန်းကို ဒေါသဖြစ်ဖြစ်နဲ့ စိတ်ထဲမှာပဲ ဆဲနိုင်တော့တယ်။
ညှော်နံ့တွေမွှန်ပြီး ကက်ဆက်သံ ဆူညံပွက်နေတဲ့ လက်ဖက်ရည်ဆိုင် တစ်ဆိုင်နားက ဒေစီဂျိန်းဖြတ်တော့ ဆိုင်ထဲက လူပြောင်လူနောက်လေးတစ်စုက မကြားတကြား လှမ်းစတယ်။ ဂျိန်းစဘွန်းမကြီးတို့ ဖြစ်သွားလိုက်ပုံများ သဘောကျတဲ့ မျက်စောင်းကို ချိတ်၊ တင်ပါးကို ယမ်းတဲ့ပြီး ဖြစ်သွားတာ၊ ခြောက်ဆယ်ကျော်ပေမယ့် ဖောက်သည်က မျှော်ချင်သေးတယ်။
‘ဂျိန်း… ဘယ်လိုလဲ’
‘သြော်… မလွမ်၊ ငွေခင့်လိုက်ရှာနေတာ’
ဒီတစ်ခါတော့ ဒေစီဂျိန်းက ကောင်းကောင်းမွန်မွန် ရပ်နှုတ်ဆက်တယ်။ မိန်းမလျာ အလွမ်က ရန်ကုန်သူ၊ ဗိုင်းကောင်းကျောက်ဖိတရုတ်ကပြားမ။ ဘွဲ့တွေဘာတွေ ရပြီးသား၊ မျက်မှန်လေးနဲ့ ပိန်ပိန်ဖြူဖြူ၊ ခပ်အေးအေး နေတတ်တယ်။ သူလည်း သူ့ဟာနဲ့သူ ကိုးကွယ်သူတွေနဲ့ တန်ခိုးထက်သား။ ဒါပေမယ့် မိန်းမလျာတို့ ထုံးစံအတိုင်း လင်ကို အမ်းရတာနဲ့ ကုန်တာပဲ။
‘ငွေခင် ဘယ်နားမလဲ သိလား’
‘ဟိုဒင်း… အရင်သူဌေးကုန်း ရှိပါရောလား။ အဲဒီ မြောက်နားမယ် ပြောတယ်’
‘ဟုတ်ပြီ ဟုတ်ပြီ၊ သွားမယ် မလွမ်’
ဒီဟာမ ငွေခင်ဟာ သူဌေးကုန်းနားကကို မခွာနိုင်ဘူး။ သူဌေးကုန်းပျက်တာတောင် ဒီနား ဝဲလည်လှည့်နေတယ်။ အင်း… မလွမ်ပြောသလို အရင်သူဌေးကုန်းဆိုတာ ဟိုတုန်းက တကယ်ရှိခဲ့ဖူးတာပေါ့။
ရန်ကုန်တို့၊ မန္တလေးတို့၊ မော်လမြိုင်တို့၊ ပုသိမ်တို့ မြို့ကြီးတွေက သူဌေးကတော်တွေ၊ သူဌေးမတွေ အနေများတဲ့ ကနားတဲအစုလေးပေါ့။ ပိုက်ဆံကလည်း ပေါပေါ၊ လွတ်ကလည်း လွတ်လပ်၊ မိန်းမလျာဆိုတဲ့ဟာတွေကလည်း (ကိုယ်ကစပြီး) အကြော်အလှော်တွေက တတ်ကြပါဘိသနဲ့။ အပျော်တွေစုံ ကုန်ကြတာပေါ့။ မိန်းမလျာတွေရဲ့ လင်လေးတွေနဲ့ ခပ်ရှုပ်ရှုပ်သူဌေးမ၊ သူဌေးကတော်တွေရဲ့ ဇာတ်လမ်းတွေ။ ခပ်လည်လည် ယောက်ျားတစ်ပိုင်း မိန်းမလျာတွေနဲ့ ဇာတ်လမ်းတွေ။ သူဌေးမတွေ၊ သူဌေးကတော်တွေ ပိုက်ဆံကုန်၊ ဆွဲကြိုးကုန်၊ လက်ကောက်ကုန်၊ နောက် ပါသမျှကုန်ရော။ အဲဒီမှာ အဲဒီနေရာ ကနားတဲအစုလေးကို သူဌေးတွေ ကုန်လို့ ‘သူဌေးကုန်၊ သူဌေးကုန်’နဲ့ ခေါ်ရင်း ကာလရွေ့လျားတော့ ‘သူဌေးကုန်း’ ဖြစ်သွားရော။
သူဌေးကုန်း စည်ကားစဉ်က ငွေခင်တို့က သူ မပါရင် မပြီးတဲ့ ဆရာမကြီးပေါ့။ ဘယ်သူဌေးမရဲ့ ကောင်းလေးနဲ့ ဘယ်သူဌေးမရဲ့ကောင်လေး အလဲအလှယ်၊ ဘယ်သူဌေးမ လက်ကောက် အရောင်းအဝယ်၊ ဆွဲကြိုးအရောင်းအဝယ်၊ သူဌေးမတွေ ဆေးထိုး၊ ဆေးစားကိစ္စ။ သူအကုန်ပါ။ ပွေချင်ရင် ငွေခင်ဆီသွား။ ပွေချင်သမျှ ငွေခင်ရပဲ။ သူဌေးကုန်း ကောင်းစားစဉ်ကပဲ သူလက်ထဲ ငွေမပြတ်တာ တွေ့ဖူးတယ်။
သူဌေးကုန်းပျက်တော့လည်း တချို့သူဌေးမတွေ သနားစရာကြီးပါ။ တွေ့တဲ့ကောင်လေး စွဲလမ်းပြီး နောက်နှစ်လာကုန်၊ နောက်နှစ်လာကုန်နဲ့ နောက်ဆုံး အိမ်ထောင်တွေ ဘာတွေ ပျက်ပြီး ကောင်လေးရဲ့မိန်းမ မိန်းမလျာ နတ်ကတော်ဆီမှာ ခိုကပ်နေရင်း ထမင်းချက်တွေ ဘာတွေဖြစ်လို့၊ ယုံနိုင်စရာမရှိဘူး။ ဝဋ်တွေပေါ့။ ဝဋ်တွေ္ဇ ဝဋ်တွေ။
ဒီနားပေါ့။ အရင်သူဌေးကုန်းဟာ ဒီနားပေါ့။ ကနားတဲတွေပေါ်မှာ တဲနဲ့မလိုက် ကော်ဇော်ကြီးတွေ၊ လေးဆင့်ချိုင့်ကြီးတွေ၊ ရေခဲချိုင့်ကြီးတွေ၊ ဇာခေါင်းအုံး၊ ဖဲခေါင်းအုံးကြီးတွေနဲ့။ စိန်ရောင် ရွှေရောင်တွေကလည်း ဖျတ်ဖျတ် ဖျတ်ဖျတ်။ အိုး… ကောင်ငယ်အရွယ်အစားစားလေးတွေကလည်း ခြေချင်းလိမ်လို့။ စားကြ၊ သောက်ကြ၊ ရယ်ကြ၊ မောကြ၊ ညုကြလို့။
ဒီသူဌေးကုန်းကို ဒေစီဂျိန်း ပုဆိုးထဘီအလံတင်ပြီး လိုက်ခဲ့ဖူးပါ့တော်။ အိမ်ကဟာလေးပေါ့။ ဘယ်သူရှိရဦးမတုံး။ တစ်နှစ်ဟာ ညကြီးပြန်မလာ၊ ပြန်မလာနဲ့ လက်စသတ်တော့ သင်းက အဲဒီကုန်း ရောက်နေတာကိုး။ အိုး… ဂျိန်းစဘွန်းမပဲ မနက်လေးနာရီ ထသွားတာ။ အချိန်ကောင်းကို သွားတာ။ အဲဒီအချိန်က အရှက်ခွဲလို့ အကောင်းဆုံးအချိန်လေ။ ဟိုမှာ ရန်များဖြစ်ရရင် ဘယ်လိုပြန်ပြောမယ်ဆိုတာ တစ်ညလုံး စာစီထားတာ။
သူဌေးကုန်း ရှေ့တည့်တည့်ကနေ ရှက်ပြီး ပြန်ပြောရင်း ဘယ်လိုပြောမယ်ဆိုတာ တစ်ညလုံး စာစီထားတာ။ သူဌေးကုန်း ရှေ့တည့်တည့်ကနေကို လှမ်းပြီး ခုနစ်သံတင်ပစ်လိုက်တာ။ ‘ဟဲ့… မင်းမင်း ထွက်ခဲ့စမ်း’ ဆိုတာက အစချီပြီး တက်သမျှ မှတ်သမျှ အဆဲအဆို အယုတ္တ အနတ္တတွေနဲ့ ကြိမ်းလိုက်တာ သူဌေးကုန်းကို ငြိမ်လို့၊ ဂျိန်းစဘွန်းမအကြောင်း သိတဲ့ မိန်းမလျာတွေကလည်း ဘယ်လှုပ်ရဲမလဲ။ သူဌေးကုန်းတစ်ခုလုံးကို ပုပ်စော်ပိုနံအောင် အပုတ်ရည်တွေ ထပ်ဖြန်းပစ်ခဲ့တယ် အေးရော။
ဟိုကောင် မင်းမောင်ကိုလည်း မှတ်လောက်သားလောက်အောင် လက်ဆွဲပြီး တစ်လမ်းလုံး အော်အော်ပြီး ပြလိုက်တယ်။ ‘ဟောဒီမှာ ကျုပ်လင် အရှက်မရှိတဲ့ သူဌေးကုန်းက ခေါ်ခဲ့ရတာပါတော့်။ ကြည့်ကြပါတော်’ နဲ့ ကောင်းကောင်း အရှက်ခွဲပေးလိုက်တယ်။ ဒါမှ သင်းမှတ်မှာ။ နောက်မလုပ်မှာ။
အရင်နဲ့မတူတဲ့ သူဌေးကုန်းဟောင်း ကနားတဲလေးတွေ နားကနေငွေခင်ရှိမယ့်ဘက် ဒေစီဂျိန်း ဖြတ်အထွက် ဂျိန်းစဘွန်း မျက်လုံးတွေက ကနားတဲ တစ်တဲထောင့်မှာ အင်္ကျီလဲနေတဲ့ အရင်သူဌေးကုန်းရဲ့ စူပါစတား သူဌေးမကြီးတစ်ယောက်ကို မြင်ဖြစ်အောင် လှမ်းမြင်တယ်။
‘ဟယ်… သူဌေးမကြီး၊ ဆံပင်တွေကို ဖြူလို့။ တောင်ပြုန်းပြန်လာပြီလား။ သူဌေးကုန်း ပြန်ဖွင့်ဦးမလို့လား’
ဒေစီဂျိန်းမှန်း သိတာနဲ့ မိန်းမကြီးက မျက်နှာပျက်သွားပြီး ချက်ချင်း ပြန်ပက်တယ်။
‘မိန်းမရွှင်အလုပ်တွေ မိန်းမလျာတွေပဲ လုပ်တာဟေ့ သိလား’
‘အေး… ဟုတ်တယ် ဟုတ်တယ်။ ကျုပ်တို့ကတော့ မိန်းမရွှင်ပဲ။ အမြဲတမ်းကို ရွှင်နေတာ။ တော်တို့ကမှ အကြေးမရတဲ့ အကြီးစား’
ကဲ… မှတ်ပြီလား။ ဒေစီဂျိန်းပါတဲ့။ မိန်းမလျာပါတဲ့။ မိန်းမလျာ လာမစမ်းနဲ့၊ မိန်းမလျာ ဆိုတာ အရှက်ကုန်ပြီးသား။ မွေးကတည်းက ဆိုင်းဘုတ်တင်ထွက်လာတာ။ ပတ်ခနဲ ပြောချပြီး ဘောက်ဆက် ဘောက်ဆက်နဲ့ ထွက်လာတဲ့ ဒေစီဂျိန်းနောက်မှာ သူဌေးမအိုကြီးကုပ်ပြီး ကျန်ရစ်ခဲ့ရှာတယ်။
‘အို… လေလွင့်ရွက်ဝါ၊ လေလွင့်မ နင့်လိုက်ရှာရတာနဲ့ ငါ အသက်ထွက်တော့မယ်ဟဲ့’
ကနားတဲရှေ့မှာ အရက်ခွက်ကိုင်ပြီး ထိုင်နေတဲ့ ငွေခင်ကို တွေ့တွေ့ချင်း ဒေစီဂျိန်းက အော်လိုက်တာနဲ့ ငွေခင်က မိန်းမလျာတို့ရဲ့ နှုတ်ဆက်အဆဲနဲ့ တုံ့ပြန်လိုက်တယ်။
‘ဘာကိစ္စ နင်က ငါ့လိုက်ရှာရတာလဲ။ လင်လဲချင်လို့လား’
ဒေစီဂျိန်းက တစ်တစ်ခွခွ တစ်လုံးဆဲလိုက်ပြန်တယ်။ ငွေခင်ကတော့ သူ့မူပိုင်ဟန်အတိုင်း ပုဆိုးလတ်လတ်ပေါ်မှာ ရှပ်အင်္ကျီလက်တို ကြောင်ကြောင်ကျားကျား အပြင်ထုတ်ဝတ်လို့ လက်တစ်ဖက်က အရက်ခွက်၊ တစ်ဖက်က စီးကရက်၊ မျက်နှာလေးက လုံးလုံး၊ နှုတ်ခမ်းပါးနဲ့ မျက်လုံးလေး ပေကလတ် ပေကလတ်နဲ့ ဒီနေ့ ဘာများရှုပ်ရမလဲလို့ စဉ်းစားနေတဲ့ပုံ။
‘ဟဲ့… ငွေခင်၊ ငါ့အမျိုးတစ်ယောက် ခုနကတင် ဆွဲကြိုးဖြတ်ခံရလို့ နင် စုံစမ်းပေးစမ်းပါ’
‘အို… ငါနဲ့ဘာဆိုင်လို့လဲ။ ငါက စခန်းမှူးမှ မဟုတ်တာ၊ ရဲမှ မဟုတ်တာ’
ဒေစီဂျိန်းကတော့ ရစ်နေတဲ့ ငွေခင့်အကြောင်းသိချင်း ဆဲလို့ချည်းသာ နေရတော့တယ်။
‘နင့်အဆက်အသွယ်တွေ ရှိသားပဲ။ ငါ့ဆီ ဘာလာစရာလိုလဲ။ နင်က အင်မတန် တန်ခိုးထက်တဲ့ ဗောင်းဆောင်းကြီးပဲ။ နင့်ကိုးကွယ်တဲ့ ကြီးကြီးမာစတာတွေ၊ သူဌေးတွေ ရှိသားပဲ။ ငါက နတ်ကတော် အစုတ်အပြတ်၊ ဘာလုပ်ပေးနိုင်မှာလဲ’
ရစ်ချင်တိုင်း ရစ်နေတဲ့ ငွေခင့်ကို ဆဲနေရုံက လွဲလို့ ဒေစီဂျိန်း ဘာမှမတတ်နိုင်တော့ဘူး။
‘ဟဲ့ကောင်မ၊ အပိုတွေ တော်တော့။ အရက်ပေးစမ်း၊ အရက်မရှိဘူးလား’
‘မရှိဘူး၊ ငါ့လာမစီးနဲ့’
‘ဟဲ့… ငါ့ကို နင်လိမ်ပြန်ပြီ။ နင့်တဲထဲမယ် ရမ်သေတ္တာကြီး ငါမြင်နေရဲ့သားနဲ့’
ငွေခင်က ကနားတဲထဲကို တစ်ချက် လှမ်းကြည့်လိုက်တယ်။
‘အေး… အဲဒါမြင်လို့ အထင်မကြီးနဲ့။ ငါ့ဟာ မဟုတ်ဘူး။ မန္တလေး တရုတ်တန်းက တရုတ်ကလေး ညီအစ်ကို ရောင်းဖို့ လာပို့ထားတာ။ မနေ့က တစ်လုံးဖောက်သောက်မိလို့ နှစ်ရာ့နှစ်ဆယ် ထည့်ရဦးမယ်။ ဟိုဘက်မယ် ရှိသေးတယ်။ ပက်စီသေတ္တာ၊ ဟိုနားအအေးဆိုင်က ကောင်းမလေး လာပို့ထားတာ၊ ရောင်းဖို့။ ခုနကမှ သောက်ချင်လို့ တော်တစ်ဆယ်ဖိုး သွားဝယ်လာတာ။ အထင်မကြီးနဲ့၊ ငွေခင့်အကြောင်း နင်သိတယ်။ ပုံတော်တွေ ကာထားတဲ့ တင်းတိမ်အနီက မြစ်ကြီးနား ဆရာတင့်ဆီက ငှားထားတာ။ ကန်တော့ပွဲနှစ်ပွဲက ရွာထဲက မွေးစားသမီး လာပို့သွားတာ။ အပေါ်မှာ တန်းထားတဲ့ ကျပ်တန်လေးတွေက တပည့်တစ်ယောက် လာလုပ်သွားတာ’
‘ဟဲ့… ဒါလောက်လည်း မကြွားပါနဲ့’
ငွေခင်တို့ကတော့ ပြောကာမှ ပိုဆိုးတော့တယ်။
‘ငွေခင်တို့က သစ်ငုတ်မြင့်တုံ၊ မြက်မြင့်တုံနဲ့ နေရတာ။ ဖြစ်သလိုပဲ။ ဆန်လေးလုံးချင်းပဲ ဝယ်စားတယ်။ မီးသွေးဖို တစ်လုံးရှိတယ်။ တစ်နေ့က ဈေးထဲသွားပြီး ထမင်းဟင်းချက်ဖို့ မြေအိုးသုံးလုံးဝယ်ခဲ့တယ်။ အကောင်းက ဆယ့်ငါးကျပ်၊ အရွဲ့က တစ်ဆယ်ဆိုတော့ အရွဲ့နှစ်လုံး ဆယ့်ငါးကျပ်နဲ့ ဆစ်ဝယ်လာခဲ့တယ်။ သောက်ရေအိုး ကောင်းတာက အစိတ်၊ နှုတ်ခမ်းပဲ့တာက ဆယ့်ငါးကျပ်တဲ့။ နှုတ်ခမ်းပဲ့တာ ယူလာခဲ့တယ်’
ဟော… ကြည့် ကြည့် လုပ်တော့မယ်။ ငွေခင်တို့ကတော့ ဒေစီဂျိန်းမယ် မဆဲနိုင်ဘဲ ရယ်ရတော့တယ်။ ပေတဲ့၊ တေတဲ့၊ ရွတ်တဲ့နေရာတော့ နှစ်ယောက်မရှိတဲ့ ကောင်မ။ ဒေစီဂျိန်းတို့ ရွတ်တာ၊ ရွဲ့တာတွေ သူ့ဘယ်မီလိမ့်မတုံး။
သူ ပိုက်ဆံမရှိတော့ဘူးဆို ဘာလုပ်မယ် မှတ်လဲ။ သူ့ကြက်ဖလား သွားပေါင်မှာ။ ပြီးတော့မှ သူ့တပည့်တစ်ယောက်ယောက် ဆူဖြိုးလာတော့မှ ငါ့ကြက်ဖလား သွားရွေးဆိုပြီး ခိုင်းတာ။ သူ့ကြက်ဖလားလေးက ငွေအစစ်ကလေးလေ။
ငွေခင်တို့ ပွေတာ၊ ရှုပ်တာတွေကတော့ ပြောစရာချည်းပဲ။ တစ်ခါဟာ ဒေစီဂျိန်းဆီက သူ မိန်းမနတ်ချော့ချင်လို့ ဆိုပြီး မင်းသမီး ထိုင်မသိမ်း ထဘီတစ်ထည် ငှားသွားတယ်။
သြော်… သင်း လှလှပပ ဝတ်ပါစေတော့ဆိုပြီး အကောင်းစားလေး ကိုယ်က ငှားလိုက်တယ်။ ဟိုတုန်းက ပေါ်တဲ့ နှစ်ထပ်ဇာရှိပါရောလား။ ဇာအဝါရောင်ပေါ်မှာ ပုလဲတွေ ကပ်ထားလိုက်သေးတာ။ ကိုယ်က အလှကြိုက်၊ အကောင်းကြိုက်ဆိုတော့ သေချာချုပ်ထားတာ။ အဲဒါကို ငှားလိုက်ပြီး တစ်ရက်လည်း မလာ၊ နှစ်ရက်လည်းမလာ၊ ဒီတောင်ပြုန်းပွဲမှာပေါ့။ ပွဲတော်တွင်းကြီးမှာ။ ဒါနဲ့ တစ်နေ့ကျတော့ အိမ်က တောက်တိုမယ်ရ အခြောက်မလေးက ‘မာမီ မာမီ့ထဘီ ညကပွဲမှာ မင်းသမီး ရူပါရုံ ဝတ်ကနေတာ တွေ့ခဲ့တယ်’တဲ့။ ဘယ်ရမလဲ။ ချက်ချင်း ပွဲထဲ လိုက်သွားတာပေါ့။ နေ့ခင်းကြီး ပွဲနောက်ထဲဝင်သွားပြီး ဒေါသဖြစ်ဖြစ်နဲ့ မင်းသမီး ရူပါရုံ ဘယ်မှာလဲ ဘာလဲနဲ့ မိန်းမလျာတို့ထုံးစံ အော်ကျယ် အော်ကျယ်လုပ်တော့ မင်းသမီးက ရှက်လွန်းလို့။ အဲဒီမှာ အရှုပ်မငွေခင်က ရှိတယ်။ မင်းသမီးခုတင်ပေါ်မှာ။ ဒေစီဂျိန်းအသံကြားတာနဲ့ စောင်ခေါင်းမြီးခြုံထားတာ။
ဒေစီဂျိန်းက ပြောလွန်းမက ပြောတော့မှ စောင်ခေါင်း မြီးခြုံထဲကနေ ဝုန်းခနဲထပြီး ‘ဟဲ့… ရော့ဟဲ့ နင့်ထဘီ’ ဆိုပြီး ပစ်ပေါက်ပေးပြီး ဆောင့်အောင့်ထွက်သွားတယ်။ အဲဒီ မင်းသမီးရူပါရုံကို သူက တစ်ညနှစ်ဆယ်နဲ့ ထဘီကို ငှားစားနေတာလေ။ ကဲ… ရှုပ်ပုံက အဲဒီလို။
‘ဟဲ့… နင် တက်ပွဲနေရာ ရောင်းဦးမလား။ လိုချင်တဲ့သူ ရှိတယ်’
ဟော… စလာပြီ။ ကြည့်၊ ရှုပ်ဖို့ ပွေဖို့ စလာပြီ။
‘မရောင်းပါဘူး။ အသက်ကြီးပါပြီ။ ဒါမျိုးတွေ မလုပ်ပါရစေနဲ့။ ငယ်တုန်းကသာ ပျော်လို့လုပ်တာ’
ငွေခင်က မျက်စောင်းထိုးပြီး ဆဲတယ်။ နှုတ်ခမ်းပါးကလည်း နှုတ်သီးကို ချွန်လို့။ ဟုတ်တယ်လေ။ ကြီးကျယ်စကားပြောတာ မဟုတ်ဘူး။ ဒေစီဂျိန်း မလုပ်ချင်ပါဘူး။ မင်းမောင်ပြောသလို သိက္ခာရှိရှိနေရမယ့် အရွယ်ရောက်ပြီ။ ဟိုတုန်းကတော့ ဘာရယ်မဟုတ်ဘူး။ ငယ်တော့ ပျော်တာနဲ့ ကိုယ့်တက်ပွဲနေရာကို ရောင်းတာ။ ကိုယ့်တက်ပွဲနေရာက ရှေ့ကျတာကိုး။ ရှေ့နေချင်တဲ့သူတွေ၊ နံပါတ်ကောင်းကောင်း လိုချင်တဲ့သူတွေက ဝယ်ကြတယ်။ ဟိုတုန်းက ဘာမှလည်း ကြေးမရပါဘူး။ အရက်နှစ်လုံးနဲ့ ငွေတစ်ရာလောက် ရတာပဲ။ ခုတော့ ဈေးကြီးမှာပေါ့။ ဒေစီဂျိန်းတို့ လုပ်မယ်ဆိုရတာပေါ့။ ကိုယ်ကတက်ပွဲလေး ငါးပွဲရှိတာ။ တစ်နေ့နှစ်ပွဲလောက် တက်နေရတာ။ နံပါတ်တွေကလည်း ရှေ့ဆုံးချည်းပဲ။ ကိုယ့်တက်ပွဲဒကာ လိုက်မလာတဲ့ တက်ပွဲမျိုး။ နေရာရောင်းလိုက် ရတာပေါ့။ ဒါပေမယ့် မလုပ်ချင်ပါဘူး။ နန်းကြီးသိရင်လည်း ဘယ်ကောင်းမတုံး။ နန်းကြီးကလည်း သိတာနဲ့ ချက်ချင်း အရေးယူမှာ။ နောက်နှစ် လုံးဝ တက်ပွဲနေရာပေးတော့မှာ မဟုတ်ဘူး။ လုပ်တဲ့သူတွေကတော့ လုပ်နေကြတာပဲ။
‘ဟဲ့… ဒီနှစ် ပခန်းကို ငါ နင်နဲ့လိုက်ခဲ့မယ် ကြားလား’
‘အမယ်လေး… မလိုက်ခဲ့ပါနဲ့။ ရှိကြီး ခိုးပါရဲ့ မယ်မင်းကြီးမရယ်’
ဒေစီဂျိန်းက အဟုတ် လက်အုပ်ချီလိုက်တော့ ငွေခင်က ဆဲပြန်တယ်။
‘နင် မောင်တော်လိုက်ငှားပေးဦးမလို့လား။ ဘာတဲ့… မော်တော်ဆလင်လေးက နှုတ်ခမ်းမွေးလေးနဲ့ ပြောပါဦး’
ငွေခင်က ဆဲလို့ချည်းနေတယ်။ ပခန်းသွားတုန်းကလည်း ပခန်းမို့ငွေခင်ရှုပ်တာတွေလေ။ ပခန်း ဦးမင်းကျော်ပွဲက ပခန်းမှာ တပေါင်းလဆို ပွဲသပ်သပ်ရှိတယ်။ တောင်ပြုန်းလိုပဲ နတ်ကတော်တွေ အကုန်သွားရတာပေါ့။ သွားရတဲ့ ခရီးကတော့ နည်းနည်းကြမ်းတယ်။
ကားတစ်တန်၊ ရထားတစ်တန်၊ မော်တော်တစ်တန်၊ လှည်းတစ်တန် သွားရတာ။ ရန်ကုန်ကနေ မန္တလေးကို မီးရထားနဲ့။ မန္တလေးကနေ ကားနဲ့ မြင်းခြံသွား၊ မြင်းခြံကနေ မြစ်ဆိပ်ကို မြင်းလှည်းနဲ့သွား မြစ်ဆိပ်ရောက်ဖို့ကို တစ်နာရီကျော်လောက် သွားရသေးတာ။ အဲဒီကမှ မော်တော်လေးတွေနဲ့ မြစ်ကြောင်းကနေ သွား၊ ပခန်းရောက်။ ရေစကြိုဘက်က သွားတဲ့လမ်းလည်း ရှိတယ်။
အဲဒီမြစ်ဆိပ်မှာပေါ့။ ကိုင်း… မော်တော်ငှားမယ်ဆိုတော့ ငွေခင်နဲ့ တွေ့ရော။ အေး… သွား နင် မော်တော်ငှားချည် ဆိုပြီး ငွေခင့်ကို စိတ်ချလွှတ်လိုက်တယ်။ ငှားလာတဲ့ မော်တော်က မော်တော်လည်း မဟုတ်ဘူး။ ပဲ့ထောင်စက်လှေ၊ အမိုးမပါ၊ အကာမပါ၊ အိမ်သာမပါ၊ လမ်းတစ်လျှောက်လုံး နေတွေပူ၊ ဆီးတွေ ဝမ်းတွေချုပ် ဖြစ်ကုန်ကြတယ်။ ဒါနဲ့ ငွေခင့်ကို ဝိုင်းဆဲကြ ဆိုကြ အပြစ်တင်ကြတော့ မော်တော်ကို မကြည့်ဘဲ မော်တော်ဆလင်ရဲ့ဓါတ်ပုံ ကြည့်ငှားလာတာတဲ့။ ကောင်းကြသေးလား။ ဓာတ်ပုံထဲက နှုတ်ခမ်းမွေးလေးနဲ့ မော်တော်ဆလင်ကို ကြိုက်ပြီး ငှားလာတာတဲ့လေ။ ကဲ… ငွေခင်တို့ကတော့။ ဒါပေမယ့် သူ့နေရာနဲ့ သူတော့လည်း ငွေခင်က အားကိုးရပါတယ်။
ပခန်းမှာပဲ ဒေစီဂျိန်းနဲ့ ကနားတဲအပေါ်အောက် နေရတဲ့ နတ်ကတော်မိန်းမတွေ အပေါ်က ရေနွေးကျမှုတို့၊ ရေကျမှုတို့၊ ခြေသံပြင်းမှုတို့နဲ့ ရန်ဖြစ်ကြရော။ ဒေစီဂျိန်းတို့က အပေါ်က…။
ရန်ဖြစ်ကြတော့ ဒေစီဂျိန်းက ဒေါသနဲ့။ ဟဲ့… ငါ့အကြောင်းသိရမယ်။ နင်တို့ကို နတ်နဲ့တိုက်မယ်။ ဘာညာနဲ့ ကြိမ်းပစ်လိုက်တယ်။ ပြီးတော့မှ ငွေခင်ကို လက်တို့ပြီး ‘ငွေခင် လုပ်လိုက်စမ်း၊ ငါ တစ်ရာပေးမယ်’ ဆိုပြီး ခိုင်းလိုက်တယ်။ ဟော… နောက်တစ်နေ့ မနက်လည်းကျရော အောက်က နတ်ကတော်မိန်းမတွေ၊ ပါလာတဲ့ ကိုးကွယ်သူ မိန်းမတွေရဲ့ ထဘီတွေ၊ ဖိနပ်တွေ၊ စတီးချိုင့်တွေ အကုန်ပျောက်ရော။
မိန်းမတွေ ကြောက်လိုက်ကြတာ။ တစ်ခါတည်း တန်းပြောင်းသွားတာပဲ။ ဟော… ငွေခင်တို့ ရေတွေ ရွှင်လို့၊ အရက်လေး တမြမြ။ စီကရက်လေး တဖွာဖွာ၊ သူငယ်လည်း အမ်းလို့။ ဒေစီဂျိန်းက စချင်တာနဲ့ ‘ဟဲ့…ငါ့ကိုတော့ နင့်စတီးချိုင့်တစ်လုံးပေးဖို့ ကောင်းတာပေါ့’ လို့ ပြောတော့ ‘ငါဘာလုပ်လို့လဲ။ နင့်နတ်က စွမ်းလို့ဖြစ်တာဥစ္စာ’တဲ့။ ငွေတစ်ရာတော့ တောင်းသွားတယ်။
‘ကဲ… ငွေခင် နင်က ငါ့ကို အရက်လည်း မတိုက်၊ ဘာလဲမတိုက် ငါသွားမယ်။ ငါပြောတာ သေချာနားထောင်၊ ဖြတ်ခံရတဲ့ ကြိုးက နှစ်ကျပ်သား။ ရှေးတုန်းက အမ်စီပုံ’
‘ဟဲ့… ရဲကို သွားပြော၊ ငါ မသိဘူးဆို’
ဒေစီဂျိန်းက ဆဲလိုက်တယ်။
‘နင်မသိဘူးဆို နင့် နတ်သတ်လေ… ကဲ’
‘သတ်’
‘နင့်နတ်ဖမ်း’
‘ဖမ်း’
ဒေစီဂျိန်းက နောက်တစ်ခွန်း ထပ်ဆဲလိုက်ပြန်တယ်။
‘ဒါပဲ၊ ညနေ ငါ့ဆီ လာစကားပြန်လှည့်။ အိမ်မှာ ဧည့်သည်တွေနဲ့။ ညနေတက်ပွဲအတွက်လည်း ဘာမှ မလုပ်ရသေးဘူး’
ဒေစီဂျိန်း ထုံးစံအတိုင်း စိတ်မြန်လက်မြန် ခုန်ထပြီး သူ့ခုံဖိနပ်ကို စီးတယ်။
‘ဟဲ့… ပိုက်ဆံပေးခဲ့ဦး’
သိပြီးသား၊ သင်းအကျင့်ကို သိပြီးသား။ သိလျက်သားနဲ့ ဒေစီဂျိန်းက မျက်စောင်းထိုး လိုက်တယ်။
‘ဘာပိုက်ဆံတုံး ပြောပါဦး’
ငွေခင့်နှုတ်ခမ်းပါးတွေ တင်းတင်းစေ့ပြီး မျက်လုံးတွေ ပေကလပ် ပေကလပ် ဖြစ်လာတယ်။
‘နင့်ကို နတ်ပွဲကခိုင်းရင် နင် အလကား လိုက်ကသလား၊ အဆစ်ပေးပြီးတော့ လိုက်ကသလား’
ဒေစီဂျိန်းက တဟားဟား ရယ်လိုက်တယ်။ ပြီးတော့မှ အိတ်ထောင်မပါတဲ့ အင်္ကျီပုတ်ပြရင်း…
‘ငါ့မှာ တစ်ပြားမှ မပါဘူး။ ညနေလာခဲ့။ ငါသွားပြီ’
ဒေစီဂျိန်းနောက်မှာ ငွေခင်တစ်ယောက် ‘ဖေ’ချင်းမိုးမွှန်ပြီး ကျန်နေခဲ့တော့တယ်။
ရဲစခန်းက ထွက်ထွက်ချင်း မင်းမင်း အိမ်ပြန်မလို့ပါဘဲ။ အိမ်မှာ ဧည့်သည်တွေလာလို့ ဒေစီဂျိန်းမရှိရင် ဘယ်သူ ဧည့်ခံမလဲ။ မင်းမင်းရှိမှ ဖြစ်မှာ။ အရှုပ်မကြီးက သူ့အပေါင်းအသင်းတွေနဲ့တွေ့ရင် တော်တော်နဲ့ ပြန်လာမှာမဟုတ်ဘူး။ မိန်းမလျာတို့ ထုံးစံ ပေါက်တတ်တရတွေ၊ ညစ်တီးညစ်ပတ်တွေ ပြောပြီး ဟီးဟီးဟားဟား လုပ်နေမှာ။ ညနေတက်ပွဲအမီတော့ ပြန်လာကောင်းပါရဲ့။
ရဲစခန်းက ထွက်ပြီး ပွဲတော်လူအုပ်ကြီးကို မင်းမင်းရှောင်ရင်း ရှောင်ရင်းနဲ့ လူသွားလူလာနည်းတဲ့ လမ်းကြားတွေထဲ ရောက်သွားတယ်။
အဲဒီမှာ လှသူဇာမေနဲ့ သွားတွေ့တော့တာပဲ။ ဒေစီဂျိန်းသာ သိရင်တော့ ‘ဟဲ့… နင့်ခြေထောက်က အဲဒီဘက် အလိုလို ဆွဲသွားတာကိုး။ တွေ့မှာပေါ့’လို့ ပြောဦးမယ်။
လှသူဇာမေတို့ ကနားတဲဆိုတာ သိလိုက်တာနဲ့ မမြင်ချင်ယောင်ဆောင်ပြီး မင်းမင်းဖြတ်လျှောက်သွားမလို့ပါပဲ။ ဒါပေမယ့် လှသူဇာမေပါတဲ့။ မျက်စိက လျင်လိုက်တဲ့ ဖြစ်ခြင်း။
‘ဟဲ့… မင်းမင်း၊ လာပါဦး မထိုင်တော့ဘူးလား’
မင်းမင်းငြင်းတော့ မိန်းမတစ်ယောက်လို အခုအခံအဖြည့်အစွက်တွေနဲ့ ပြင်ဆင်ထားတဲ့ လှသူဇာမေက မိန်းမတစ်ယောက်လိုပဲ နီရဲတွတ်နှုတ်ခမ်းလေးကို လှလှပပ မဲ့တယ်။
‘စိမ်းကားလိုက်တာ မောင်ရယ်။ ခဏလေးပါ လာပါဦး။ ပြောစရာရှိလို့’
ဘယ်ကောင်းတော့မလဲ။ ကနားတဲပေါ် မင်းမင်း တက်ထိုင်ရတော့တယ်။ ဒေစီဂျိန်းသာ ဆိုရင်တော့ ပြောလိုက်ပါလိမ့်မယ်။ နင်တို့က ထိုင်ချင်လို့ ညိုမြလုပ်နေတာ မဟုတ်လားလို့။ လှသူဇာမေ ကနားတဲက သုံးခန်းတွဲယူထားတာ။ အလှအပ ပြင်ဆင်ထားတာလည်း အပျံစားပဲ။ ပိုးအိပ်ရာခင်းတွေ ဘာတွေနဲ့ အိပ်ခန်းကို ဖွဲ့ထားတယ်။
‘ကဲ… မျက်လုံးကလည်း ဘယ်ဝဲနေတာတုံး။ ရော့… သောက်၊ မန္တလေးရမ်အစစ်။ ကြက်ကြော်လေးနဲ့ မြည်း’
လှသူဇာမေရဲ့ ရောင်စုံမျက်နှာက မချိုမချဉ်နဲ့။ မင်းမင်း အနားကို အသာကပ်လိုက်တယ်။
‘ပါတယ်၊ စပ်ပေးဦး။ သုံးပေးဦး”
‘ဘယ်မှာလဲ၊ ဈေးကြီးမှာပါ။ မဟုတ်တဲ့ဈေးတွေ’
‘သြော်… မဟုတ်တာတွေ စွပ်စွဲပြန်ပြီ’
လှသူဇာမေက ပုံတော်တွေဆီ လှမ်းလက်အုပ်ချီလိုက်တယ်။
‘မမှတ်တာပြော နတ်သတ်ပါစေတော်။ တကယ်ပါ၊ မာမီ့အကြောင်း မင်းလည်း သိသားနဲ့။ မယုံရင် ခဏနေဦး’
လှသူဇာမေက အရွယ်နဲ့မလိုက်အောင် ဖျတ်ဖျတ်လတ်လတ်ထသွားတယ်။ သူလည်း ဒေစီဂျိန်းတို့နဲ့ မတိမ်းမယိမ်းထဲကပဲ။ သူက နည်းနည်းပဲ ငယ်မှာ။
‘ကိုမင်း…ဒီကိုလာ’
လှသူဇာမေက ပိုးအိပ်ခန်းကျဉ်းကျဉ်းလေးဝကနေ လှမ်းခေါ်တယ်။ မင်းမင်း အသာထသွားတော့ မှောင်မည်းမည်း ပိုးအိပ်ခန်းကျဉ်းလေးထဲမှာ အရေးပေါ် လျှပ်စစ်မီးက မီးရောင်လေး လင်းလာတယ်။ အိပ်ခန်းဝကနေ မင်းမင်း လှမ်းမြင်နေရတယ်။
အိပ်ချင် မပြေ့တပြေ မျက်လုံးလေးနဲ့ မိတ်ကပ် မပြယ့်တပြယ်ကောင်မလေး တစ်ယောက်။ ပြီးတော့ နှစ်နှစ်ခြိုက်ခြိုက် အိပ်နေတဲ့ ကောင်မလေးတစ်ယောက်။
‘ဘယ့်နှယ်လဲ။ ဒါလေးလေ၊ ဒီလောက် ရှိတယ်’
ှသူဇာမေက လက်တစ်ချောင်းထောင်ပြတယ်။ တစ်ထောင်ပေါ့။ မင်းမင်းက နှာခေါင်းရှုံ့ပြတော့ မိန်းမလျာမျက်စောင်းကို လှလှပပ ချိတ်ပြတယ်။
အိပ်ချင်မူးတူး တစ်ထောင်တန်လေးက အလုပ်သဘောအရ လှစ်ခနဲ ပြုံးပြရင်း ပြန်အိပ်ပျော်အသွားမှာ မင်းမင်းကြိုက်ချင်သလိုဖြစ်သွားတဲ့ ပိုက်ဆံတောင်းတဲ့ အဆိုတော်မလေး မျက်နှာလေးနဲ့ တော်တော်တူတယ်။ မိတ်ကပ်မပါ၊ ဘာမပါ မျက်နှာပြောင်လေးနဲ့ အားငယ်ပြီး အရာရာကို ကြောက်နေတဲ့ မျက်နှာမျိုးလေ။
မင်းမင်း လှည့်ထွက်ခဲ့တော့ လှသူဇာမေလည်း ထွက်လိုက်လာတယ်။ ကနားတဲပေါ်က မင်းမင်း ဆင်းလိုက်တော့ လှသူဇာမေက…
‘ဟောတော်… သွားပြီလား၊ ဘယ်လိုလဲ’
‘ညဘက်မှ လာခဲ့မယ်လေ။ ညနေတက်ပွဲရှိတယ်’
‘လာခဲ့နော်။ ဟဲ့… မင်းမင်း ပွဲခပေးမှာပါဟဲ့’
‘အင်းပါ… အင်းပါ’
လှသူဇာမေတို့ကတော့ မလွယ်ဘူး။ သူက မကောင်းမှုဆို အကုန်ဝါသနာထုံတဲ့ မိန်းမလျာ နတ်ကတော်။ သူ့ဆီမှာ လိုချင်တာရမယ်။ ပြီးတော့ သူက ကြားထဲက ပိုက်ဆံဖြတ်စားတယ်။
ဒေစီဂျိန်းက လှသူဇာမေများဆို အလွန်မုန်း။ တူတယ် တန်တယ် မထင်ဘူး။ လှသူဇာမေလိုဟာတွေ ဒီပွဲတော်ထဲမှာ အများကြီးပါ။
ကနားတဲတန်းတွေကြားက မင်းမင်း ဖြတ်ထွက်လိုက်တယ်။ ကနားတဲပေါ်မှာ ခြွေရံသင်းပင်းနည်းနည်းနဲ့ နတ်ဝင်ယိမ်းယိုင်နေတဲ့ ရှေးနတ်ကတော် အဘွားအိုကြီးတစ်ယောက်ကို မြင်ရတယ်။ တစ်ခေါင်းလုံးဖွေးနေတဲ့ ဆံပင်နဲ့ ပိုးပဝါဖြူနဲ့ ဗလာထဘီရှားညိုရောင်ချိတ်နဲ့ဟာ လိုက်ဖက်ပြီး ကျက်သရေ ရှိတယ်။
မျက်စိမှိတ်ပြီး ခေါင်းကလေးတုန်တုန် ကွမ်းလေးမြုံ့မြုံ့နဲ့ နတ်ကတော်ကြီးကို မင်းမင်း လှမ်းလက်အုပ်ချီလိုက်တယ်။ သနားပါတယ်။ အကြော်အလှော်ကောင်းတဲ့ မိန်းမလျာ နတ်ကတော်တွေကိုမှ နတ်ကတော်လို့ ထင်ကြတော့တဲ့ ဒီခေတ်ကြီးမှာ ရှေးနတ်ကတော် အဘွားအိုကြီးတွေကို ကိုးကွယ်သူ နည်းပါးသွားပါပြီ။ မိန်းမစစ်စစ် နတ်ကတော်ဟာ တောင်ပြုန်းမှာ သိပ်နည်းသွားပြီ။ နတ်ကတော်ဆိုရင် မိန်းမလျာမှ ဆိုတဲ့ခေတ်ကို ရောက်သွားပြီ။
အိမ်ဝိုင်းထဲမှာ အပြည့်ဆောက်ထားတဲ့ ကနားတဲတွေ ကြားကနေ လူရှင်းမယ့်လမ်းကြားကို မင်းမင်းထွက်ဖို့ ကြိုးစားပေမယ့် မလွယ်ဘူး။ ဒီနေ့ ဒီရက်ကတော့ ဘယ်လမ်းကြားမှ လူမရှင်းဘူး။ လူကတော့ တိုးနေရမှာပဲ။ လူရေစီးကြောင်းထဲမှာ ကိုယ်လည်း တဖြည်းဖြည်းလိုက်ရွေ့ရမှာပဲ။
‘အို… သူငယ်ချင်းရေ… ခုတော့ ငယ်ကျွမ်းဆွေ… ခုလို ပြန်လည်ဆုံတွေ့ရတာ ဝမ်းသာမဆုံးနိုင်ပေ… ခုလို ပြန်လည်ဆုံတွေ့ရတာ…’
ချိုးနွဲ့စူးရှနေတဲ့ သီချင်းသံဟာ လူရေစီးကြောင်းထဲကို ထိုးဖောက်ဝင်ရောက်လို့ လာခဲ့တယ်။ ဟိုကောင်မလေးပဲ။ ပန်းညိုလေ…ပန်းညို၊ ဘယ်နားကများ ဆိုနေပါလိမ့်။
ပြွပ်သိပ်နေတဲ့ ဟိုဘက် ကနားတဲတန်းတွေဘက်ကို မင်းမင်း လှမ်းကြည့်တယ်။ အဝတ်ဗုံသံလေးကတော့ တဖြည်းဖြည်း နီးလာသလိုပဲ။
‘ဒီတတားလေးပေါ်မှာ နှစ်ယောက်တွဲ ကစားကြပုံတွေ… မှတ်မိပါတယ် အတူးရေ… မှတ်မိပါတယ် အသက်ရေ… ငယ်က ကျွမ်းတဲ့ ငယ်ကျွမ်းဆွေ’
တော်တော် လွမ်းအောင်ဆိုတတ်တဲ့ ကောင်မလေးပဲ။ သနားသွားအောင်လည်း စွမ်းဆောင်နိုင်တယ်။ ဒီအသံကလေးကို ကြားရင် ဘယ်သူမှ မသနားဘဲ မနေနိုင်ပါဘူး။ ပိုက်ဆံမထည့်ဘဲလည်း မနေနိုင်ပါဘူး။
လူရေစီးကြောင်းထဲကနေ မင်းမင်း ထွက်လိုက်တယ်။
ဟိုဘက် ကနားတဲတွေဘက်ကို တိုးဝင်ခဲ့တယ်။
ဟော… ဟိုမှာ ပန်းညိုကတော့ သူ့ပုံစံအတိုင်း ခေါင်းလေးငုံ့၊ မျက်နှာလေးကို တဘက်လေး ဖုံးအုပ်လို့။ ဘေးနားက ဝတုတ်တုတ် ကောင်မလေးက စဥ့်အိုးအဝတ်ဗုံလေး တီးလို့။
ထမင်းထုပ်၊ ဟင်းထုပ်ဆွဲရတဲ့ ကောင်းလေးကတော့ ကနားတဲပေါ်က မိန်းမလျာတစ်ယောက် ထည့်ပေးနေတဲ့ ထမင်းတစ်ခဲကို ချိုင့်လေးနဲ့ ခံနေတယ်။
အိတ်ထောင်ထဲက ဆယ့်ငါးကျပ်တန်လေး နှစ်ရွက်ကို မင်းမင်းစမ်းသပ်နှိုက်ယူနေတုန်းမှာပဲ ရုတ်တရက် လူအုပ်ကြီးက ဝုန်းခနဲ ပြိုဆင်းလာခဲ့တယ်။
‘ခါးပိုက်နှိုက်… ခါးပိုက်နှိုက်’
သြော်… ပြဿနာပဲ။ နီးရာ တစ်တဲပေါ်ကို မင်းမင်းခုန်တက်လိုက်ရတယ်။ မိန်းမလျာတွေရဲ့ အသံမျိုးစုံ အော်ဟစ်သံတွေနဲ့အတူ လူအုပ်ကြီးက ခဏရှုပ်ထွေးသွားပြီး ပုံမှန်ပြန်ဖြစ်ချိန်မှာ ပန်းညိုတို့ဆီ မင်းမင်း ကြည့်လိုက်တော့ သြော်… ဒုက္ခပဲ။
ပန်းညိုမောင်လေးလက်ထဲက ထမင်းတွေ ဟင်းတွေ မြေကြီးပေါ် အကုန်ပြန့်ကြဲနေပြီ။ ပန်းညိုခေါင်းပေါ်က တဘက်ကလေးလည်း မရှိတော့ဘူး။ အဲဒါတော့ ကောင်းတယ်။ မင်းမင်းကြိုက်တယ်။ ကောင်မလေးမျက်နှာကို ကြည့်လို့ရတယ်။
သနပ်ခါးပါးကွက်ကလေးနဲ့ ချစ်စရာကောင်းနေတဲ့ ပန်းညိုက ဒါတော့ သူလည်သား။ ပိုက်ဆံထည့်တဲ့ ချိုင့်လေးက သူ့ရင်ခွင်ထဲမှာ။
‘မောင်လုံးက သိပ်အတာပဲ။ မြဲမြဲကိုင်ထားမှပေါ့ဟ။ ထမင်းတွေ ဟင်းတွေ အများကြီးပဲ။ နှမြောပါတယ်’
ဗုံတီးတဲ့ ကောင်မလေးက မျက်ရည်ဝိုင်းနေတဲ့ သူ့မောင်လေးကို ပြောဆိုနေတယ်။
‘ငါ့တဘက်လေး လူတွေထဲ ပါသွားပြီ’
ပန်းညိုက ညည်းညူရင်း ‘သွားစို့’တဲ့။ ရုတ်တရက် မင်းမင်း သူ့ရှေ့မှာ ရပ်လိုက်တော့ သူရှက်သွားပြီး ပုန်းခိုစရာ သူ့တဘက်ကို ယောက်ယမ်းရှာတယ်။ တော်တော်ကြောက်တတ်တဲ့ ကောင်မလေး။
‘ကဲ… လာ၊ တို့ဘက် လိုက်ခဲ့ကြ။ ထမင်းတွေ ဟင်းတွေ ပြန်ထည့်ပေးလိုက်မယ်’
ဗုံတီးတဲ့ ကောင်မလေးနဲ့ ကောင်လေးက မင်းမင်းကို ကြည့်တယ်။ ပန်းညိုကတော့ ခေါင်းကို ငုံ့လို့။
‘မှတ်မိလား၊ မနေ့တုန်းက နန်းကြီးနားက အိမ်ကလေ၊ ကြက်သားကြော်တွေ၊ ဟင်းချိုတွေ ပေးလိုက်တာလေ’
‘သိပြီ၊ သိပြီ ပိုက်ဆံတွေ အများကြီးရတဲ့ အိမ်’
ဗုံတီးတဲ့ ကောင်မလေးက ဝမ်းသာအားရ အော်လိုက်တယ်။
‘ကဲ… ဒါဖြင့် လာကြ၊ လိုက်ခဲ့ကြ’
‘မလိုက်တော့ဘူး။ အဘွား ထမင်းဆာနေလိမ့်မယ်’
ပန်းညိုဆီက အသံတိုးတိုးလေး ထွက်လာတယ်။
‘မလိုက်တော့ ပန်းညိုတို့အဘွားကို ထမင်း ဘယ်လိုကျွေးမှာလဲ။ ဒီမှာ ထမင်းမှ မရှိတော့တာ’
ပန်းညိုက ရှက်လို့ချည်းနေတယ်။
‘ဝယ်ကျွေးတော့မယ်’
ပန်းညိုက ‘သွားစို့’တဲ့။ ပြောရင်း ဗုံတီးတဲ့ ကောင်မလေး ခြုံထားတဲ့ ပုဆိုးပိုင်းအနွမ်းကို ဆွဲယူတယ်။ ပြီးတော့ ခေါင်းပေါ်မှာ ခြုံလိုက်တယ်။ ပန်းညိုကို ဟိုကောင်မလေးကလည်း ပြောရဲဟန်မတူဘူး။
‘ကဲ… ဒါဖြင့်၊ ရော့… ပန်းညိုတို့အဘွားကို ထမင်းဝယ်ကျွေးလိုက်’
မင်းမင်းလှမ်းပေးတဲ့ ဆယ့်ငါးကျပ်တန် နှစ်ရွက်ကို ပန်းညိုက ချိုင့်လေးနဲ့ခံတယ်။ ပြီးတော့ အသံတိုးလေးနဲ့ ‘သီချင်းပြန်ဆိုပြရဦးမှာလား’တဲ့။ သနားပါတယ်။ ဒါပေမယ့် ကောင်မလေးကို မင်းမင်း စချင်နေတယ်။
‘ဘာသီချင်းဆိုပြမှာလဲ’
‘မသိဘူးလေ။ ဆိုခိုင်းတာပေါ့’
‘တို့ကြိုက်တဲ့သီချင်း ရလို့လား’
‘ဘာသီချင်းလဲ’
မခံချင်စိတ်နဲ့ ပုဆိုးပိုင်းအုပ်ထားတဲ့ ပန်းညိုမျက်နှာလေး မော့လာတယ်။
‘သက်ဆိုင်သူသို့လေ… ရလား’
‘ရတာပေါ့’
‘ဟာ… အစ်ကို သွားမလုပ်နဲ့။ သူက သီချင်းတွေ အများကြီးရတာ’
ဗုံတီးတဲ့ ကောင်မလေးက ဝင်ပြောတော့ ပန်းညိုပြုံးပြီး ခေါင်းငုံသွားတယ်။
“ဆိုရမှာလား။ မဆိုရရင် သွားတော့မယ်။ အဘွား စောင့်နေလိမ့်မယ်”
“သွားပါဗျာ၊ သွားပါ။ နောက်တစ်ခါဆိုပြပါ။ ပန်းညိုတို့နေတာက ဘယ်နားမှာလဲ”
“ရွာပြင်ဘက်က ဇရပ်ပျက်ကြီးမှာ”
ပန်းညိုခေါင်းက ပိုငုံ့သွားပြီး ရှေ့ကနေ သွားတော့တယ်။ သြော်… အဲဒီဇရပ်ကြီးကို မင်းမင်းသိတာပေါ့။ အနယ်နယ် အရပ်ရပ်က နွမ်းပါးတဲ့ လူပေါင်းစုံ တည်းခိုရာ နေရာကြီးပေါ့။
“ညဘက်ကျ ထွက်ရသေးလား”
“မထွက်ပါဘူး။ မောလွန်းလို့ ထမင်းစားပြီး အိပ်ပျော်သွားတာပဲ”
သီချင်းဆိုနေတဲ့ အချိန်ကလွဲရင် ဒီကောင်မလေးဟာ ချစ်စရာ သနားစရာ ကလေးလေးပါ။
“ဘယ်ကို လိုက်မလို့လဲ”
ပန်းညိုက သူတို့နဲ့လိုက်လာတဲ့ မင်းမင်းကို ခေါင်းလေး စောင်းပြီး မေးတယ်။
“မလိုက်ပါဘူး ခင်ဗျား။ ကျွန်တော်က ဒီဘက်ကနေ အိမ်ပြန်မှာပါ”
ပြောရင်းနဲ့ မင်းမင်းက ကနားတဲ လမ်းကြားတစ်ခုထဲကို ချိုးကွေ့လိုက်တယ်။
“နက်ဖြန် အိမ်ဘက်လာခဲ့နော်”
ဖျတ်ခနဲ လှမ်းကြည့်လိုက်တဲ့ ကောင်မလေးကို မင်းမင်း မျက်လုံးတစ်ဖက်မှိတ်ပြရင်း ပြုံးပြလိုက်တယ်။
ပန်းညို ရှက်တတ်တဲ့ မင်းအမူအရာလေးတွေဟာ တို့စိတ်ကို လှုပ်ရှားစေတယ်။ ဒေစီဂျိန်းသာ သိရင်တော့ တို့ကို ပြောဦးမယ်။ နင်ဟာလေ မိန်းမအစစ်ဆိုရင် ဘယ်သူ့ကိုပဲဖြစ်ဖြစ် စိတ်ဝင်စားတာပဲ မဟုတ်လားလို့ မညှာမတာ အပြောခံရဦးမယ်။
သူ နားမလည်ပါဘူး။ ဒါပေမယ့် တို့ကို သူ ဘယ်တော့မှ အလစ်ပေးမှာ မဟုတ်ဘူး။
ပန်းညို…
လှသူဇာမေဆီမှာတွေ့ခဲ့တဲ့ ကောင်မလေးဆီကို တို့သွားဖို့ ဆုံးဖြတ်လိုက်တာကို မင်းသိရင် စိတ်ဆိုးမှာလား။
လဆန်း ဆယ့်နှစ်ရက်ညရဲ့ လရောင်ဟာ ဒေစီဂျိန်းရဲ့ အိမ်ဝရန်တာဆီကို ပြောက်တိ ပြောက်ကျား တိုးဝင်လာတယ်။
တရှူးရှူးအိပ်ပျော်သွားတဲ့ ဒေစီဂျိန်း ခြေသလုံးတွေကို ဖြည်းဖြည်းချင်း နှိပ်ပေးနေရာက မင်းမင်း အသာရပ်လိုက်တယ်။
ညနေက နန်းကြီးတက်ပွဲနှစ်ပွဲနဲ့ အောက်နန်းတစ်ပွဲ ဆက်တက်လိုက်ရတဲ့ အရှိန်နဲ့ ဒေစီဂျိန်းတစ်ယောက် မောသွားသလို မူးလည်းမူးသွားတယ်။ မူးတော့ မင်းမင်းကို ဂျစ်တယ်။ ရိတယ်။ ပွေ့ထား၊ ဖက်ထား၊ ယပ်ခတ်ပေး၊ နှိပ်ပေးနဲ့။ အဖုံကြီးတို့၊ တင်တင်မြင့်တို့ နှိပ်ပေးမယ်ဆိုတာ မရဘူး။ မင်းမင်းလက်ကမှ ပေါက်သတဲ့။ မင်းမင်း နှိပ်တာကမှ ထိသတဲ့။ တော်တော်ဆိုးတယ်။ အသက်လည်း ခြောက်ဆယ်တွင်း ရောက်ပြီ။ ခုထိ ကလေးဆန်ချင်တုန်း။ လှချင်ပချင်တုန်း၊ ကချင်ခုန်ချင်တုန်း၊ နားသယ်စပ်တွေမှာ ဖြူစပြုနေတဲ့ ဆံပင်တွေကို လရောင်အောက်မှာ အထင်းသား မြင်နေရတယ်။
ဒီအသက်အရွယ်နဲ့ ဒီလောက် ခုန်ပေါက်လှုပ်ရှားလာရတာ သူ မောရှာမှာပေါ့လေ။ ခုနစ်နှစ်ဆိုတဲ့ အချိန်ကာလရဲ့ သံယောဇဉ် မင်းမင်းမှာ ရှိပါတယ်။ သူ့ကို အမေတစ်ယောက်လိုလည်း ချစ်ခဲ့ပါတယ်။ အစ်မကြီးတစ်ယောက်လိုလည်း ချစ်ခဲ့ပါတယ်။ ဇနီးမယားတစ်ယောက်လိုကတော့ ဘယ်တုန်းကမှ ချစ်လို့မရခဲ့ဘူး။ ဒါပေမယ့် မင်းမင်းဘဝကို အရှုပ်မကြီးကတော့ နားလည်မှာ မဟုတ်ပါဘူး။
အိမ်အောက်ကို မင်းမင်း အသာဆင်းခဲ့တယ်။ အိမ်ပေါ်ထပ်တံခါးကို စေ့ထားခဲ့တယ်။ အောက်ထပ်မှာ ဆေးလိပ်လေး တစ်တိုနဲ့ ငြိမ်ထိုင်နေတဲ့ ဗိုင်းကောင်းကျောက်ဖိ အဖုံကြီးကို လက်ဟန်ခြေဟန်ပြပြီး မင်းမင်း ထွက်ခဲ့တယ်။
မီးလုံးဝါ မှုန်ရီရီလေးတွေကြားထဲကို မင်းမင်း တိုးဝင်လိုက်တာနဲ့ အလွန်အကျွံ ခြယ်သထားတဲ့ မိတ်ကပ်မျက်နှာများစွာက စောင့်ကြိုလို့နေတယ်။
မိန်းကလေးအစစ်နဲ့ ခွဲခြားလို့မရအောင် ဝတ်စားဆင်ယင်ထားတဲ့ မိန်းမလျာလေးတွေလေ။ ကနားတဲတန်းတွေကြားမှာ လိပ်ပြာကလေးတွေကို တဖျပ်ဖျပ် တောင်ပံခတ်ရင်း တစ်ညက ချစ်သူကို လိုက်ရှာနေကြလေရဲ့။
သူတို့ဟာ မြွေမလေးတွေလိုပဲ သူတို့အသားကို စားဖူးတဲ့ သူရဲ့အနံ့ကို သိတယ်ထင်ပါရဲ့။ မင်းမင်းကို မြင်တာနဲ့ “မ” သံမျိုးစုံပေးကြတယ်။ “မောင်ရေ”လို့ လှိုက်လှိုက်လှဲလှဲ ခေါ်လိုက်တာလည်း ရှိရဲ့။ “အချစ်ရေ”လို့ ညုတုတုလေး ခေါ်လိုက်တာလည်း ရှိရဲ့။
ဖလိုင်းကစ် အနမ်းပျံကို အသံမြည်အောင်ပေးရင်း ဖိတ်ခေါ်တဲ့ မျက်လုံးလေးကို ဝင့်ပြသွားတဲ့သူလည်း ရှိတယ်။
တချို့က ခပ်ကဲကဲလေးတွေကျ လက်ဖမ်းဆွဲထားပြီး “သဲသဲကို မချစ်နိုင်တော့ဘူးလား မောင်”တဲ့။ “သဲမလှလို့လားဟင်” ဆိုပြီး ရှေ့တွေနောက်တွေ ကိုယ်ဟန်ပြနေလို့ အသာရုန်းပြီး ပြေးရတယ်။
လှသူဇာမေတို့ ကနားတဲရောက်သည်အထိ မိန်းမတုလေးတွေက မင်းမင်းနားမှာ ရစ်ဝဲ ဆွဲဆောင်တုန်း။ မောင်ရေ အချစ်ရေ ခေါ်တုန်း။
“ကဲ… ရှင်တော့ အဲဒါတွေပဲ ခေါ်သွားတော့။ ပိုက်ဆံလည်း မကုန်ဘူး။ ခေါက်ဆွဲကြော်လည်း စားရဦးမယ်”
လှသူဇာမေက မင်းမင်းကို ဆီကြိုနှုတ်ဆက်တယ်။ ကနားတဲပေါ်မှာ လှသူဇာမေ တစ်ယောက်တည်းရယ်။ ဘယ်သူမှလည်း မရှိဘူး။ ပိုးအိပ်ခန်းကျဉ်းလေးကလည်း ငြိမ်သက်လို့။
“ဘယ်လိုလဲဗျ”
လှသူဇာမေက မိန်းမလျာမျက်စောင်းကို အားကုန်ထိုးချလိုက်တယ်။
“သြော်… ကိုမင်းမင်းရဲ့၊ အားလုံးကုန်ပြီရှင့် ”
“ဟာဗျာ”
လှသူဇာမေက တအစ်အစ်နဲ့ လှောင်ရယ်ရယ်နေတယ်။
“သွားမယ်ဗျာ”
“နေပါဦး၊ ရော့ တစ်ခွက်တစ်ဖလား”
လှသူဇာမေဆီက ဖန်ခွကိုယူပြီး မင်းမင်း မော့လိုက်တယ်။
“ရေပါဘုရာ့”
လှသူဇာမေက ရေခွက်ကို ကမ်းပေးတယ်။ လက်ဖက်အစ်ကို ထိုးပေးတယ်။
“ယူဦးမလား”
“တော်ပြီဗျာ၊ ညနေတက်ပွဲမှာ သောက်ထားတာ များထားတယ်”
“အတုတွေ သောက်ပြီးတော့များတော်၊ ရှင် ခုပြေနေပါပြီ။ ကျုပ်ဟာ အစစ်ရော့…”
“တော်ပြီ… ရပြီ”
ပွဲဈေးတန်းဘက်ကို မင်းမင်း ထွက်ခဲ့တယ်။ တခြိမ့်ခြိမ့်တီးနေတဲ့ အောက်နန်းနတ်ဆိုင်းသံတွေကြားကို ဖြတ်သန်းရင်း မူးယစ်ရီဝေလို့ လာတယ်။ နတ်ဒိုးသံ ကြမ်းကြမ်းရိုင်းရိုင်းဟာ သွေးကို ကြွစေတယ်။ မူးယစ်ရီဝေခြင်းနဲ့ ပေါင်းစပ်ထားတဲ့ နတ်ဒိုးသံကြမ်းကြမ်းရိုင်းရိုင်းဟာ အချစ်သွေးကိုလည်း ကြွစေနိုင်ပါလား။
မင်းမင်းခြေလှမ်းတွေက ရွာပြင်ဘက်ကို အလိုလိုဦးတည်တယ်။ ရွာပြင်ဘက် ဇရပ်ပျက်ကြီးပေါ်မှာ ပန်းညိုဆိုတဲ့ ချစ်စရာ ကောင်မလေးရှိတယ်။ သူကလေးကို မင်းမင်းချစ်လို့ ရနိုင်ပါ့မလား။ တကယ်တော့ သူကလေးဟာ သီချင်းဆိုပြီး ပိုက်ဆံတောင်းရရှာတဲ့ ကောင်မလေး။ ချစ်ဖို့ထက် သနားဖို့ကောင်းတဲ့ ကောင်မလေးပါ။
မင်းမင်းခြေလှမ်းတွေက ဇရပ်ကြီးဆီကိုလည်း ဦးတည်နေဆဲ။ အရက်နံ့စူးစူးကို ကာကွယ်ဖို့အတွက် ကွမ်းယာဝယ်စားဖို့ကိုလည်း မင်းမင်း သတိရတယ်။
ရွာပြင်ဘက်က မှောင်နေတာပဲ။ ဖယောင်းတိုင်၊ မီးခွက် မီးအလင်းရောင်လေးတွေနဲ့ လူနွမ်းပါးတွေ သက်ဝင်လှုပ်ရှားနေတဲ့ ဇရပ်ကြီးကို အမှောင်ထဲကနေ လှမ်းမြင်နေရတယ်။
ဟင်းနဲ့၊ ညှော်နံ့နဲ့ ရန်ဖြစ်သံ၊ ဆဲဆိုသံ၊ ကလေးငိုသံတွေ လုံးထွေးပျံ့လွင့်လို့ နေတယ်။
ဇရပ်ကြီးပေါ်မှာ မီးရောင်မှိန်မှိန်တွေထဲကို မှောင်ရိပ်ကနေ မင်းမင်း အသာတိတ်တိတ်လေး ကြည့်တယ်။ မီးရောင်မှိန်မှိန်အောက်မှာ လူတွေ တော်တော်များများ ထမင်းစားနေကြတယ်။ ပန်းညို၊ မင်းလေး ဘယ်မှာလဲ။ စောင့်ခြုံထားတဲ့ မိန်းမသဏ္ဌာန်တစ်ခုဟာ မင်းများလား။ သီးချင်းတွေ အများကြီးဆိုပြီး မောမောနဲ့ အိပ်ပျော်နေပြီလား။
ရုတ်တရက် မင်းမင်းရှေ့နားက လေချွန်သံ မပီမသလေးတစ်ခု ဖြတ်သွားတော့ မင်းမင်း ကြည့်လိုက်တယ်။ အငြိမ်မနေ လှုပ်ရှားလာတဲ့ ကောင်လေးတစ်ယောက်။ ကောင်လေးက သူ့လက်ထဲက အထုပ်ကလေးကို အပေါ်မြှောက်ကစားလိုက်တယ်။ ဟာ… ဒီကောင် ပန်းညိုမောင်လေး၊ ဟိုကောင်လေးပဲ။
‘ဟေ့ကောင်၊ ဘယ်က ပြန်လာတာလဲ’
မှောင်ရိပ်ထဲက မင်းမင်းထွက်လာတော့ ကောင်လေးက လန့်သွားတယ်။ ပြီးတော့မှ ဝမ်းသာအားရ အော်တယ်။
‘ဟာ… အစ်ကို’
‘ပန်းညိုတို့ရော ဘယ်မှာလဲကွ၊ အိပ်ပြီလား။ ငါက မင်းတို့ဆီ လာလည်တာ’
‘မပန်းညိုတို့ မအိပ်သေးဘူး။ ဒီမှာ သူဝယ်ခိုင်းလို့ ကျတော်အချဉ်ထုပ် သွားဝယ်ပေးရတာ’
‘ဟုတ်လား၊ သူက အချဉ်ထုပ်ကြိုက်လား’
‘ကြိုက်တာပေါ့။ ညအိပ်ခါနီးဆို သူက အချဉ်ထုပ်စားရမှ’
ကောင်လေးနဲ့တူတူ ဇရပ်ကြီးပေါ်ကို မင်းမင်း တက်ခဲ့တယ်။ ဆွေးမြည့်ဟောင်းနွမ်းနေတဲ့ ဇရပ်ကြမ်းပြင်တစ်လျှောက်မှာ သူ့နေရာလေးတွေသူ ပိုင်းခြားပြီး နေရာယူထားကြတဲ့ လူနွမ်းပါးတွေ။ တောင်ပြုန်းပွဲတော်ကို အကြောင်းပြုလို့ ငွေစ၊ ကြေးစလေးတွေ ရဖို့အတွက် အကြောင်းအမျိုးမျိုးနဲ့ ရောက်နေကြသူတွေ။
ဇရပ်ကြီးရဲ့ တစ်ဖက်အစွန်းနားမှာတော့ ဖယောင်းတိုင် မီးရောင်အလင်းနဲ့ ဝင်းပချစ်စရာ ကောင်းနေတဲ့ သနပ်ခါးပါးကွက်ကျား ပိုင်ရှင်မလေး ပန်းညိုကို မင်းမင်း တွေ့လိုက်ရတယ်။
ခေါင်းပေါ်မှာ ဘာတဘက်မှ ဖုံးအုပ်မထားတဲ့ ပန်းညို ဆံပင်ရှည်တွေက ပခုံးပေါ်မှာ ဝဲပျံကျလို့။ ပိုပြီး ငယ်နုသွားသွားပြီး ပိုပြီး ချစ်စရာ ကောင်းနေတယ် ပန်းညို။
‘ဧည့်သည်လာတယ်လေ၊ ဧည့်သည်’
မင်းမင်းကို မြင်တာနဲ့ ပန်းညိုမျက်လုံးလေး ဝိုင်းသွားတယ်။ ဒါပေမယ့် အံ့သြစရာ၊ ကျေကျေနပ်နပ် လှလှပပ ပြုံးလို့။
‘ဒီနေရာကို သိသားပဲ’
‘သိတာပေါ့’
‘သိတာပေါ့ဟဲ့… ဒီနေရာများ ခက်လွန်းလို့’
ဗုံတီးတဲ့ ဝတုတ်မလေးက ဝင်ပြောတယ်။ သူတို့ဘေးနားမှာ ဆေးလိပ်လေးနဲ့ မှိန်းငိုက်နေတဲ့ ပိန်ပိန်သေးသေး အဘွားအိုက မျက်လုံးတွေကို မှေးကုပ်ကြည့်ရင်း နားကိုလည်း လက်ကာ စွင့်တယ်။
‘အဘွားက နားလေးတယ်။ မျက်စိလည်း မှုန်တယ်။ အသက်ရှစ်ဆယ် ရှိပြီ’
သူ့အဘွားအကြောင်းကိုလည်း ပန်းညိုပြောပြနေတာ စိတ်ပါလက်ပါ။ ပါးစပ်ထဲမှာလည်း အချဉ်ထုပ်က မြုံ့ရသေးတယ်။
‘အဘွား၊ ဒါ မနေ့တုန်းက ကြက်သားကြော်တွေ၊ ပိုက်ဆံတွေ ပေးလိုက်တဲ့အိမ်က အစ်ကိုလေ သိလား’
ပန်းညိုက အသံတိုးတိုးနဲ့ နှုတ်သွက်လျှာသွက်မလေး ဖြစ်လို့နေတယ်။ အစ်ကိုတဲ့၊ သူက သူ့အဘွား မကြားတာကို ပြန်ပြောရင်း ရှက်ရယ် ရယ်လို့ချည်းနေတယ်။ စိတ်ကစားတတ်တဲ့ အရွယ်လေးရယ်။ မင်း ဘာဖြစ်နေတယ်ဆိုတာ သိပါတယ်။
‘ပန်းညိုတို့ကို မုန့်ကျွေးမလို့ ဝင်လာတယ်။ ပွဲဈေးတန်း သွားစားရအောင်၊ လာ’
ပန်းညိုမျက်နှာက ခဏတော့ ဝင်းလက်သွားတယ်။ ပြီးတော့ ခေါင်းခါတယ်။
‘ပန်းညိုတို့မှာ အဝတ်အစားကောင်းတာ မရှိဘူးရယ်။ ပြီးတော့ လူတောထဲကို ပန်းညိုတို့နဲ့ အစ်ကို သွားရဲလား’
‘ဘာလို့ မသွားရဲရမှာလဲ၊ ဘာဆိုင်လဲ’
မင်းမင်းရင်ထဲက သနားစိတ်မှန်သမျှကို ဒီကောင်မလေး အကုန်ဆွဲယူသွားတော့မယ် ထင်ပါရဲ့။
‘ကဲ… လာ လာ၊ ညဘက်မှာ အဝတ်အစားကို လူမမြင်ပါဘူး။ အဆိုတော်ကြီး တော်တော်လှချင်တယ်ကွာ’
ပန်းညိုက ပြုံးပြီး ခေါင်းငုံ့နေဆဲ။ မောင်လုံးက မင်းမင်းကို ကြည့်ပြီး…
‘ကျွန်တော်ရော လိုက်ရမှာလား’တဲ့။ မင်းမင်းက ခေါင်းညိတ်ပြလိုက်တယ်။
‘လိုက်မှာလား မိပြုံး’
ပန်းညိုက ဗုံတီးတဲ့ ကောင်မလေးကို မေးရင်း သူ့အဘွားကိုလည်း ကြည့်ပြန်တယ်။ ဗုံတီးတဲ့ ကောင်မလေးက သူ့အဘွားနားကို ကပ်လိုက်တယ်။
‘အဘွား… ပွဲဈေးတန်းမှာ မုန့်သွားဝယ်စားမလို့။ မုန့်… မုန့်…’
နှစ်ခါ သုံးခါ ထပ်အော်တော့မှ…
ပန်းညိုတို့အဘွားက ခေါင်းတညိတ်ညိတ်နဲ့ ‘မြန်မြန်ပြန်လာကြ’ တဲ့။
‘လာ… လာ… သွားမယ်’
မင်းမင်းနဲ့ မောင်လုံးက ရှေ့ကနေ ဆင်းနှင့်တယ်။ ပန်းညိုတို့ဘေးနားက လူတချို့ကတော့ အိပ်ပျော်နေကြပြီ။ တချို့ကတော့ ထမင်းပူပူ ဟင်းပူပူကို ငုံ့လွေးကြတုန်း။
‘အဝေးကြီး မသွားချင်ဘူးနော်’
စိုးရိမ်တဲ့ ပန်းညိုအသံတိုးတိုးကြောင့် မင်းမင်း လှည့်ကြည့်လိုက်တယ်။ ကြည့်စမ်း… ခေါင်းမှာ ပုဆိုးပိုင်းကြီး ပတ်လို့။
‘ဟာ… ဒါကြီးက ဘာလုပ်တာလဲ၊ ဖယ်စမ်းပါ’
ပန်းညိုခေါင်းပေါ်က ပုဆိုးပိုင်းကို မင်းမင်း ဆွဲယူဖယ်လိုက်တယ်။
‘အို… ပန်းညို မနေတတ်ဘူး။ လူတောထဲသွားရင် မျက်နှာကို အုပ်ထားမှ သွားရဲတာ’
မင်းမင်းဆီက ပုဆိုးပိုင်းကို ပန်းညိုက ပြန်ယူဖို့ ကြိုးစားတယ်။ မင်းမင်းက လုံးထားတဲ့ ပုဆိုးပိုင်းကို မှောင်ရိပ်ထဲကို လွှင့်ပစ်လိုက်တယ်။
‘သွားပေရော့၊ နက်ဖြန်ကျ တဘက်အသစ်တစ်ထည် အစ်ကိုပေးမယ်’
ဆံပင်ရှည်တွေ ကပိုကရိုနဲ့ မနေတတ် မထိုင်တတ်ဖြစ်နေတဲ့ ပန်းညိုမျက်နှာလေးက ချစ်ချင်စရာလေး။ မောင်လုံးနဲ့ မပြုံးဆိုတဲ့ ကောင်မလေးမပါရင် သိပ်ကောင်းမှာပဲ။ ရီဝေ ရီဝေ ဖြစ်နေတဲ့ အရှိန်နဲ့ လူတွေကျပ်ညပ်နေတဲ့ ပွဲဈေးတန်းထဲမှာ ပန်းညိုလက်ကလေးကို အတင်းဆွဲထားမိတယ်။ အေးစက်တုန်ယင်နေတဲ့ လက်ကလေးတွေက မင်းမင်းလက်ထဲကနေ ဟန်ဆောင် ရုန်းထွက်တယ်။
ခုနေများ အရှုပ်မကြီး ဒေစီဂျိန်းတစ်ယောက် တွေ့လိုက်ရင် ဘယ်လိုများ ဖြစ်လေမလဲ။ မင်းမင်း မတွေးဝံ့ဘူး။ ဟင့်အင်း… မင်းမင်း မတွေ့ချင်ပါဘူး။ သာယာနေတဲ့ဘဝလေးမှာ ခဏကလေး နေပါရစေဦး။
‘ပန်းညိုတို့ ဘာစားမှာလဲ ပြော။ လက်ဖက်ရည်နဲ့ ထပ်တစ်ရာ စားမလား၊ ခေါက်ဆွဲကြော် စားမလား’
မင်းမင်း ဘယ်လိုပဲခေါ်ခေါ် သုံးယောက်စလုံးက ဆိုင်ထဲကို ဝင်ဖို့ အတင်းငြင်းကြတယ်။ မဝင်ရဲရှာကြဘူး။ လမ်းဘေးက ဆိုင်လေးတွေမှာပဲ မုန့်တီစားမယ်တဲ့။ သူတို့ မုန့်တီစားနေတဲ့အချိန်မှာ မင်းမင်းက သုံးလေးဆိုင်ကျော်ကို ပြေးပြီး တစ်ခွက်တစ်ဖလား သွားမော့တယ်။ ပြီးတော့ ကွမ်းယာဆိုင်ဝင်တယ်။
‘ဟဲ့… မင်းမင်း’
ရုတ်တရက် မင်းမင်း လန့်သွားတယ်။ ဘုရား… ဘုရား၊ ငွေခင်… ငွေခင်။ တော်သေးရဲ့။ ခုနက မုန့်တီဆိုင်မှာ မတွေ့လို့။
ဟိုဟာမကြီး မူးအောင် တိုက်ထားခဲ့ပလားဟဲ့။ နင် ဘယ်သူနဲ့ ချိန်းထားလဲ၊ ငါ့ကို ပြော’
‘ပြဿနာမရှာစမ်းပါနဲ့ဗျာ။ ကျုပ်ဟာကျုပ် ပျင်းလို့ ထွက်လာတာ။ ခင်ဗျားသာ ဒီအရွယ်ကြီးနဲ့ အရှာအဖွေထွက်နေ သိလား’
‘ထွက်တယ်ဟေ့ ထွက်တယ်။ အချစ်ဆိုတာ အိုသည်မရှိ၊ အစဉ်နုပျို နေသော တို့နတ်ကတော်ဟဲ့။ အေး… ဘယ်သူငယ်မှ မတွေ့ရင် နင်ပဲ၊ လိုက်ခဲ့၊ နင့်ခေါ်သွားမယ်’
‘သွားစမ်းပါ’
ငွေခင်ကို အသာတွန်းပစ်ခဲ့ပြီး မင်းမင်း အသာလစ်ပြေးခဲ့ရတယ်။ မလွယ်ဘူး… မလွယ်ဘူး။ ဒီနားမှာ ကြာကြာနေရင် အန္တရာယ်ရှိနိုင်တယ်။ သြော်… အရှုပ်မကြီးရဲ့ စက်ကွင်းက လွတ်ပဲ မလွတ်နိုင်ပါလားနော်။
‘ပြန်ကြစို့၊ အဘွားမျှော်နေလိမ့်မယ်’
မင်းမင်းကို မြင်လိုက်တာနဲ့ ပြောလိုက်တဲ့ ပန်းညိုအသံ တိုးတိုးလေးကို ဒီတစ်ခါ မင်းမင်း ကျေးဇူးတင်မိတယ်။ ဒီနားတစ်ဝိုက်မှာ မင်းမင်းတို့ ကြာကြာနေလို့ မဖြစ်ဘူး။
‘ဘာစားဦးမလဲ ပန်းညို၊ ဝပြီလား။ အချဉ်ထုတ် စားဦးမလား’
‘ဟင့်အင်း… တော်ပြီ၊ ဝပါတယ်’
အပြန်လမ်းမှာ ပန်းညိုတို့ သုံးယောက်နောက်ကနေ မင်းမင်းက မသိမသာ ခပ်ခွာခွာလိုက်တယ်။ မျက်နှာရောင်စုံနဲ့ မိန်းမတုလေးတွေထဲမှာ ဒေစီဂျိန်းကို သိတဲ့သူတွေ အများကြီး ပါနိုင်တယ်ဆိုတာ မင်းမင်း မေ့ထားလို့ မဖြစ်ဘူး။
‘ပန်းညိုတို့ကို မုန့်ဝယ်ကျွေးရတာ အစ်ကို ပိုက်ဆံတွေ အများကြီးကုန်တာပေါ့’
‘မကုန်ပါဘူး ပန်းညိုရယ်’
အရေးထဲမှာမှ စကားနည်းမလေးက မင်းမင်းကို စကားပြောချင်နေရှာတယ်။ ရွာပြင်ဘက်ကို ရောက်အောင် မြန်မြန်လျှောက်ပါမှ။
‘နက်ဖြန်ကျရင် အစ်ကိုတို့အိမ်မှာ ပန်းညို သီချင်းလာဆိုပြပါ့မယ်။ ဟိုသီချင်းလေ’
‘ဘယ်သီချင်းလဲ’
‘သက်ဆိုင်သူသို့လေ’
သြော်… သနားစရာ ကောင်မလေးရယ်။ မင်းမင်း ရုတ်တရက် ရိသဲ့သဲ့ပြောလိုက်တဲ့ သီချင်းကို သူမှတ်ထားရှာတယ်။ မင်းမင်းက မေ့နေပြီ။
‘ပန်းညိုက သီချင်းတွေ အများကြီးရတယ်နော်။ ဘယ်ကနေ ရတာလဲ။ ဘယ်သူသင်ပေးလဲ’
‘ဝါသနာပါလို့ ပန်းညိုရတာပါ။ ဓာတ်စက်ဖွင့်တဲ့ဆီကတို့၊ ကက်ဆက်ဖွင့်တဲ့ဆီကတို့ လိုက်ဆိုရင်းပေါ့’
ရွာပြင်ဘက်က လေကလေးက ကနားတဲတွေဆီက နတ်ပန်းနံ့တွေကို သယ်ဆောင်လာတယ်။ နတ်ပန်းနံ့နဲ့ နတ်ဒိုးသံသဲ့သဲ့ဟာ စိတ်ကို လှုပ်ရှားစေတယ်။ ပြီးတော့ ကောင်းမလေးရဲ့ မိန်းမနံ့၊ အင်း… မိန်းမစစ်စစ်အနံ့ဟာ မင်းမင်းစိတ်တွေကို ပိုလို့ လှုပ်ရှားစေတယ်။
‘ပန်းညိုတို့က မောင်နှမ ဘယ်နှယောက်လဲ’
‘သုံးယောက်၊ အခု ဒီသုံးယောက်လေ’
‘ပန်းညိုက အကြီးလား’
‘ဟုတ်တယ်’
‘ပန်းညိုတို့ အဖေ၊ အမေတွေကရော’
ပန်းညိုက ခဏလေး ငြိမ်သွားတယ်။
‘အဖေနဲ့အမေက ကွဲသွားကြတာ။ အမေက ပန်းညိုတို့နဲ့ ခဏနေသေးတယ်။ နောက်တော့ ထွက်သွားတာ ပြန်မလာတော့ဘူး’
‘သြော်… ဒီအလုပ်ကို ပန်းညိုလုပ်ချင်မှာ မဟုတ်ဘူးနော်’
‘မသိပါဘူး။ သီချင်းဆိုရတာတော့ ပန်းညို ပျော်ပါတယ်။ ဟို… ရွာမှာတော့ ဒီအလုပ်ကို ပန်းညိုတို့ မလုပ်ပါဘူး။ အဝတ်လျှော်တာတို့၊ ယာကူလီတို့လုပ်တာ။ ပွဲတော်တွေမှာပဲ ဒီအလုပ်ကို လိုက်လုပ်တာ။ ပန်းညို သီချင်းတွေ ဘာတွေ မဆိုတတ်ခင်တုန်းကဆို အဘွားက မလုပ်ခိုင်းပါဘူး။ ပန်းညိုတို့ကို အဘွားက သူများအိမ်မှာ ခိုင်းတာလုပ်ပြီး ရှာကျွေးလာတာ’
သူများအိမ်မှာ ခိုင်းတာလုပ်ပြီးတဲ့။ မင်းမင်းရင်ထဲမှာ ကျင်ခနဲဖြစ်တယ်။ လောကကြီးထဲမှာ မရှိတော့တဲ့ မင်းမင်းရဲ့အမေဟာလည်း မင်းမင်းတို့မောင်နှမတွေကို သူများအိမ်မှာ ခိုင်းတာလုပ်ပြီး ရှာကျွေးခဲ့ရရှာတာလေ။
‘ဒီအလုပ်က ပိုက်ဆံတော့ရတယ် မဟုတ်လား’
‘ရတယ်။ ပန်းညိုကို သနားပြီး ပေးကြတာတွေပေါ့’
‘ဟုတ်တယ်။ ပန်းညိုက သနားစရာကောင်းတယ်’
ဇရပ်နားမရောက်ခင် မှောင်ရိပ်မှာ မင်းမင်းက ရပ်လိုက်တယ်။ မောင်လုံးနဲ့ မိပြုံးက ဇရပ်နားကို ရောက်သွားကြပြီ။
‘ချစ်စရာလည်း ကောင်းတယ်’
ပန်းညိုကိုယ်လုံးကလေးကို မင်းမင်း ဆွဲဖက်လိုက်တယ်။ မူးယစ်တဲ့အရှိန်က မင်းမင်းကို တွန်းအားပေးနေတယ်။ ဒီကောင်မလေးကို ဒီည ရနိုင်ပါ့မလား။ ထိတ်လန့်တုန်ယင်နေတဲ့ အပျိုမလေး ပါးပြင်ကို မင်းမင်းက အတင်းနမ်းတယ်။
‘အဲလိုမလုပ်နဲ့… မလုပ်ပါနဲ့’
မပီမသ ကြောက်ကြောက်လန့်လန့်ထွက်လာတဲ့ အသံတိုးလေးက နစ်ဝင်မေ့မျောသွားတော့မလိုဘဲ။ ရုတ်တရက် သနားစိတ်က ပန်းညိုကို လွတ်မြောက်သွားစေတယ်။
နောက်ဆုတ်သွားတဲ့ ပန်းညိုတစ်ကိုယ်လုံး တုန်ယင်နေတယ်။
‘ချစ်လို့ပါ ပန်းညိုရယ်’
ပန်းညိုလက်ကလေးကို မင်းမင်း ဖျတ်ခနဲ လှမ်းဆွဲလိုက်ပြန်တယ်။
‘အရက်တွေ သောက်ထားတယ်’
ပန်းညိုအသံ တုန်နေပြီး ငိုသံပါနေတယ်။
‘နည်းနည်းလေးပါကွာ။ ညနေတက်ပွဲတုန်းက ကိုကြီးကျော်က ဇွတ်တိုက်လို့။ ပန်းညို အစ်ကို့ကို ချစ်တယ်မဟုတ်လားဟင်’
ကောင်မလေးက မင်းမင်းလက်ထဲကနေ သူ့လက်တွေကို မရုန်းပါလား။ ဒီကောင်မလေးကို ရတော့မယ်ဆိုတာ အတွေ့အကြုံပေါင်းများစွာအရ မင်းမင်း သိလိုက်ပြီ။ ကောင်မလေးကို ဆွဲဖက်ပြီး ပါးကလေးကို နောက်တစ်ကြိမ် နမ်းလိုက်တယ်။
‘နတ်ကတော်ကြီးနဲ့ အစ်ကိုနဲ့က ဘာတော်တာလဲဟင်’
ကောင်မလေးရဲ့ အသံတိုးလေးဟာ မင်းမင်းနားထဲမှာ ပြင်းထန်လှတဲ့ ဗုံးတစ်လုံး ပေါက်ကွဲသံလိုပဲ။ ကောင်မလေးကိုယ်ပေါ်က မင်းမင်းလက်တွေ အလိုလို ပြေလျော့သွားတယ်။
မှောင်ရိပ်ထဲက မင်းမင်းအဖြေကို စောင့်နေတဲ့ ရိုးသားတဲ့ မျက်နှာလေးကို မင်းမင်း မြင်လို့ရနေတယ်။
‘ဦးဘစီက အစ်ကိုတော်တယ်။ အရင်းတော့ မဟုတ်ဘူး။ နှစ်ဝမ်းကွဲ ဆွေမျိုးပေါ့’
‘အစ်ကိုက သူ့ဆီမှာ ဘာလုပ်ရလဲဟင်’
ကောင်မလေးရဲ့ အသံတိုးလေးတွေက မင်းမင်း အသားထဲကို အပ်ဖျားလေးတွေ စိုက်ဝင်သွားကြသလိုပဲ။
‘မန်နေဂျာပေါ့။ သူ့မန်နေဂျာလေ။ သူ့ပွဲကိစ္စတွေ ဘာတွေတွေအားလုံး စီစဉ်ပေးရတာပေါ့။
‘သြော်… ’
ခေါင်းညိတ် ယုံကြည်နေရှာတဲ့ ကောင်မလေးကို ဖြေရင်း မင်းမင်း ဝမ်းနည်းလာတယ်။ ပြီးတော့ သူ့လက်တွေကို အားကိုးတကြီး ဆုပ်ကိုင်ထားတဲ့ ကောင်မလေးနဲ့ အိမ်ထောင်အစစ်တစ်ခုကို ထူထောင်ပြီး လူလောကကြီးကို ရဲရဲရင့်ရင့် ရင်ဆိုင်ချင်တဲ့စိတ်တွေ မဝင်စဖူး ဝင်လာနေတယ်။ ကောင်မလေးကို ညင်ညင်သာသာ နမ်းရှိုက်လိုက်တယ်။
‘ချစ်တယ်’
ဒီတစ်ခါစကားဟာ ရင်ထဲကပဲ ပြောပေမယ့် ကိုယ်တကယ်ပြောမိတာပါ။ မိန်းမလျာတွေ၊ မိန်းမစစ်တွေကို အခါများစွာ ပြောခဲ့ဖူးတဲ့ ‘ချစ်တယ်’နဲ့ ဘယ်လိုမှ မတူဘူးဆိုတာ ယုံပါ ပန်းညိုရယ်။
Aug
31
2010
အဓိပတိ 